Bya Ssemakula John
Kampala
Poliisi ekutte abantu bana okuli Heedimasita, omwami akuuma abayizi abalenzi (Warden), omusomesa eyali ku mulimu awamu ne Metulooni, bannyonnyole ku ngeri omuliro gye gwakwata ekisulo ky’abayizi e Kawempe ne gutta abamu ate abalala ne batwalibwa nga biwalattaka.
Ku makya ga Ssande, abayizi bana ab’essomero lya New Crest -Kibedi Day and Boarding Primary School baafa ekiziyiro ate abalala abawerako ne batwalibwa nga bali bubi oluvannyuma lw’ekisulo ky’abayizi abawala okukwata omuliro ku ssaawa nga 9:30 ez’ekiro.
Omwogezi wa poliisi mu ggwanga, Fred Enanga ategeezezza bannamawulire nti okunoonyereza kwe baakakolawo kulaze nti waaliwo obulagajjavu ku batwala essomero lino era kye kiyinza okuba nga kyavaako omuliro okusaasaana.
“Ekisulo kyalimu abaana 53 ate nga kitono kuba obutanda obwalimu bwali busulako abayizi basatu basatu. Waaliwo amakubo matono nnyo eri abayizi bano okuyitamu nga waliwo akabenje. Ensawo n’engoye byonna byali bisuuliddwa ku ttaka ate tewali byuma bizikiza muliro wadde obudde obulabula ng’omuliro gubaluseewo.” Enanga bw’agambye.
Poliisi by’ezudde biraga nti mu kisulo kino mwalimu akasenge akalala Metulooni mwe yali asula awamu n’abaana abalala era kirowoozebwa nti eno omuliro gye gwatandikira era olw’okuba kaali katono kye kyavaako abayizi okufa ekiziyiro.
Wabula Enanga agamba nti omuliro nga gutandise Metulooni na Asikaali baagezaako nnyo okufulumya abamu ku bayizi abali babuliddwa we bayita.
Abakwate kuliko; Heedimasita Twaha Sseruwu, Omusomesa eyali akola ekiro ekyo, Ahmed Ssengooba, akuuma abaana abalenzi Hamid Kabibi.
Ate omutandisi w’essomero lino, Hajji Abdu Kibedi awamu n’akulira eby’okulambula amasomero bayitiddwa okubaako bye bannyonnyola ku muliro guno.
Enanga asabye abakulira amasomero okutegeeza poliisi singa wabaawo okwekengera kwonna kwe bafunye.