Bya Ssemakula John
Kampala
Poliisi mu ggwanga eriko omusajja gw’ekutte nga kigambibwa nti aliko ekitundu ekinene ku ttaka lye kye yapangisizza eri ekibinja ky’abayeekera ekipya kitandike okutendekerako abantu abanaatabangula emirembe mu ggwanga.
Ab’ebyokwerinda bagamba nti mu mwezi gumu bakutte abantu abasoba mu 20 nga bonna bakibiina kya Uganda Coalition Forces of Change (UCFC) abaagala kusuula gavumenti nga bakozesa emmundu.
Bw’abadde ayogerako ne bannamawulire, omwogezi wa poliisi mu ggwanga, Fred Enanga agamba nti bongedde amaanyi mu kunoonya abali mu kibinja.
“Twakutte Lwanga Samuel Ssengonzi omutuuze we Kassanda ng’agambibwa okupangisa ekitundu ku ttaka lye eri ekibinja kya abayeekera batendekereko abantu abaabwe kati ono avunaanibwa emisango gw’okugezaako okuwagira ebikolwa by’ekiyeekera.” Enanga bw’agambye.
Okusinziira ku Enanga balina n’omuntu omulala Alex Bogere eyakulembeddemu ab’ebyokwerinda n’abatwala mu nnimiro ya kasooli mu Wakiso ewabadde wakwekeddwa emmundu endala eyabbibwa oluvannyuma lw’okulumba poliisi.
Emmundu eno, Enanga agamba nti basanze amasasi 18 ku ago 30 agagibeeramu, gakozesebwa era n’akakasa nti omuyiggo gw’okuzuula emmundu endala ebbiri ezabbibwa ku bapoliisi nagwo gukyagenda mu maaso.
Enanga agamba nti abayeekera b’akabinja kano baakakwatako 25 era n’asaba abantu okubeera obulindaala kuba abayeekera bano balina enteekateeka z’okulumba poliisi ez’enjawulo.