Bya Ssemakula John
Bulange – Mmengo
Ssaabasajja Kabaka Ronald Muwenda Mutebi II asiimye okusanyusibwa abaweereza be okuva mu bitongole eby’enjawulo mu kivvulu ky’ennyimba z’amazaalibwa ga Yesu Kristo e Bulange -Mmengo akawungeezi konna ak’Olwokutaano.
Beene azze ne Nnaabagereka Sylvia Nagginda, Nnaabagereka Sylivia Nagginda, Nnaalinnya Lubuga Agnes Nabaloga, Omulangira David Kintu Wassajja ne Ssaabaganzi, nebaanirizibwa Katikkiro wa Buganda Charles Peter Mayiga n’abakungu abalala.
Era bw’atudde ku Nnamulondo, Omukolo ne gutandika n’okusaba okukulembeddwamu Ssaabasumba w’essaza enkulu erya Kampala, Paul Ssemogerere eyeebazizza omutonzi olw’okuyisa Buganda mu mbeera ez’enjawulo ezibadde zigisoomooza.
Oluvannyuma Kkwaya ez’enjawulo ziyimbye ennyimba z’amazaalibwa nga mu zino mubaddemu ez’abaana b’abakozi, St. Francis Xavier e Bweyogerere, abakozi awamu n’ezivudde mu bitundu eby’enjawulo.
Katikkiro Charles Peter Mayiga ategeezezza nti guno gwe mukolo ogwokubiri nga bajaguliza mu mbeera y’ekirwadde kya Ssennyiga Corona.
Owek. Mayiga annyonnyodde Omuteregga ng’abantu be bwe bajjumbidde enteekateeka za Buganda ez’enjawulo ng’Oluwalo, Emmwanyi Terimba n’endala. Wano Mayiga ayanjulidde Kabaka abakozi abasinze banne awamu n’ekitongole ekisinze.
Ekitongole kya Nnamulondo Investments kye kisinze ne kiddirira BBS Terefayina olwo Buganda Land Board n’ekwata ekyokusatu era bano baweereddwa ebirabo eby’enjawulo.
Omutanda era asiimye n’akoleeza omuti gwa Ssekukkulu n’oluvannyuma n’akwasa abaami b’amasaza emmotoka kapyata kika kya Harrier okubayambako okutambuza emirimu.
Nnyinimu oluvannyuma asiimye n’agabula Obuganda n’ekijjulo kya Cceeki era n’asiima okwekubya ebifaananyi n’abagenyi be ab’enjawulo.