Bya Francis Ndugwa
Namirembe – Kyaddondo
Katikkiro Charles Peter Mayiga ategezezza nti Nnamasole omuggya amaze okulondebwa oluvannyuma lwa Nnamasole Margaret Nagawa Siwoza Muyanja okuseerera ssabbiiti ewedde.
Ekirangiriro kino Kamalabyonna Mayiga akikoledde mu Lutikko e Namirembe mu kusabira omwoyo gw’omugenzi okwetabiddwamu ebikonge eby’enjawulo.
“Nnamasole bw’aseerera wabaawo emikolo egikulembera okumutereka era emikolo egyo gyatandika dda era gikyagenda mu maaso. Kyokka we njogerera, Obuganda bwamaze dda okufuna Nnamasole. Wabula olw’okuba wakyaliwo emikolo egitambuzibwa, ajja kulangirirwa mu budde obutuufu nga n’emikolo gyonna gikomekerezeddwa.” Owek. Mayiga bw’ategeezezza.
Owek. Mayiga agamba nti omugenzi akyusizza Obwannamasole era ettoffaali ddene ly’atadde ku Buganda ne Uganda; n’amanyisa abavubuka obukulu bwa Nnamasole.
Mayiga annyonnyodde nti Obwannamasole bukulu nnyo mu Buganda era enkola y’okumulaga yatandikira mu Ssekabaka Ssuuna II agalamidde e Wamala eyasooka okulaba nnyina.
Okusaba okukulembeddwamu Omulabirizi w’e Namirembe, Rt. Rev. Wilberforce Kityo Luwalira wamu ne Ssaabalabirizi wa Uganda, Dr. Steven Samuel Kazimba Mugalu abatenderezza ennyo emirimu gy’omugenzi gy’akoledde Obuganda n’Ekkanisa ya Uganda.
Ate ye Omulabirizi wa West Buganda, Henry Katumba Tamale abadde omubuulizi w’olunaku, asabye Obuganda okwekwasa Katonda mu mbeera yonna okusobola okutuuka ku biruubirirwa kyokka abantu bafeeyo okwetegekera ebiseera byabwe ebyomu maaso.
Ye Katikkiro w’ekika ky’Enkima, Michael Mugadya, ku lw’Omutaka Charles Mugema Nsejjere Mugwanya agambye nti ekika kifiiriddwa omuntu afuddeyo ennyo okulwanirira omwana omuwala n’obutonde bw’ensi.
Ku lw’abaana b’omugenzi, Anthony Nakibinge aweze okutwala mu maaso emirimu gya maama waabwe era baakutwala erinnya lye mu maaso.
Okusaba kuno kwetabiddwamu; Maama Nnaabagereka Sylvia Nagginda, Abaana b’eng’oma, Abalangira n’Abambejja, Katikkiro eyawummula Daniel Muliika, akulira oludda oluwabula gavumenti, Mathias Mpuuga, akulira ekibiina kya NUP, Robert Kyagulanyi Ssentamu awamu n’abakungu abalala.