Bya Musasi Waffe
Kyaddondo
Abantu ba Kabaka mu ssaza Kyaddondo baakedde kwetaba mu misinde gy’Omutanda era abamu ku bano baakungaanidde ku luguudo olumanyiddwa nga Bobi Wine Road era baasoose kunyeenya kugaliba enjole ng’ akabonero k’okujaguza olunaku luno.
Ate ku mbuga y’essaza e Kasangati, abaayo baasimbuddwa Omulangira Ssimbwa Khalid ate mu ggombolola ya Nangabo, emisinde gyasimbuddwa RDC w’e Kasangati, Tom Muwonge era wano eyaliko mmeeya wa Kasangati Tonny Ssempebwa yasabye abantu okujjumbira bulijjo okukola Bulungibwansi naddala nga balina enguudo.
Mu Munisipaali y’e Kira mu Wakiso, emisinde gino gyakulembeddwamu omubaka omukyala owa Wakiso, Betty Ethel Naluyima ng’ono yadduse wamu n’abakulembeze abalala okwabadde aba gavumenti eyaawakati wamu ne Buganda.
Buddu
Mu ssaza lya Kabaka e Buddu, okudduka okukulu kwabadde ku Liberation Square e Masaka era ng’omuddusi ow’enjawulo yabadde omwami owa Kabaka amulamulirako essaza Buddu, Ppookino Jude Muleke.
Mu balala mwabaddemu omubaka omukyala ow’e Masaka, Juliet Nakabuye Kakande era ng’emisinde gino gyasibuddwa Meeya wa masaka, Florence Namayanja.
E Kirumba ku Muteesa 1 Royal University, emisinde gino gyasimbuddwa akulira emirimu ku ssettendekero ono, Birinde Jamiruh ng’ono yeebazizza Empologoma olw’okutumbula ebyobulamu.
E Lwengo omwami wa Ssabasajja atwala eggombolola ya Mituba VII, Kigemuzi Mmande Kabalega yaakulembeddemu abaddusi bano era yasabye abantu bonna bulijjo okufuba okwekuuma akawuka akaleeta Mukenenya era emisinde gino gyetabiddwako n’Omubaka wa Bukoto Mid- West, Muyanja Muhamad Ssentaayi .
Ate bo ab’e Bukomansimbi baakulembeddwamu ababaka baabwe okwabadde; omubaka owa Bukomansimbi North, Dr Christine Ndiwalana Nandagire, Omubaka omukyala Veronica Nannyondo ne Rogers Namanya eyakiikiridde DPC w’e Bukomansimbi n’abalala nga bano badduse okuva mu Town y’e Bukomansimbi olugendo lwa kkiromita 7 mulamba.
Bano beegattiddwako abakulembeze mu disitulikiti ey’e Masaka nga baabadde bakulembeddwamu omubaka omukyala owa disitulikiti, Joan Namutaawe ssaako n’abaami ba Kabaka okwabadde; Hajji Zakaria Ssali, Mulongo Bakale Kajjeerero, Ssaabagabo Kyanamukaaka n’owa Mutuba I Buwunga -Mpanga, Beatrice Nabiseere.
Bo ab’e Kalungu ku kudduka emisinde bagasseeko okukola bulungibwansi ng’okuva mu ggombolola y’e Lwabenge, Bukulula ne Kalungu nga bino byajjumbiddwa abakulembezze ab’enjawulo okwabadde; ababaka ba Palamenti, bassentebe b’eggombolola ne bakansala baabwe nga baakulembeddwamu; Nsibambi Frank, Kiraga John ne Nsimbe Vincent.
Wano abakyala we baasinzidde ne basaba abaami bonna okwekomako baleme kufuna na kusaasaanya kawuka ka Mukenenya n’endwadde endala ez’ekikaba .