Bya Ssemakula John
Bulange -Mmengo
Ttiimu y’essaza lya Ssingo eyongedde okuvumbeera mu mpaka z’emupiira gy’amasaza ez’omwaka guno bw’egudde amaliri ne ttiimu ya Kabula ku ggoolo 2-2 mu mipiira egizannyiddwa olwaleero ku FUFA Technical Centre e Njeru.
Ggoolo za Kabula ziteebeddwa omuzannyi Valentino Odoi mu ddakiika eya 31 ne 38 ate nga eza Ssingo ziteebeddwa Bright Adoa ne Joseph Ssewaali.
Mu ngeri yeemu Gomba nayo egudde maliri ne Buluuli mu kikopo kino nga guwedde buli ttiimu ebala ggoolo emu.
Gomba eyawangula empaka z’omwaka oguwedde y’esooseewo, era ggoolo yaayo eteebeddwa omusambi Brian Aniku mu kitundu ekisooka ate nga Abdul Malik y’ateebye ggoolo ya Buluuli mu kitundu ky’omuzannyo ekyokubiri.
Mu mpaka zino, omuzannyi wa Buluuli, Derrick Kaija, Ddifiri Henry Musisi amuwadde kkaadi emyufu oluvannyuma lw’okuweebwa kkaadi za kyenvu ebbiri olw’okukola ebisobyo.
Empaka zino zigenda kuddamu okuzannyibwa ku Lwomukaaga lwa ssabbiiti eno n’emipiira 2 wakati wa Buluuli ne Ssingo n’ogwa Kabula ng’ettunka ne Kyaddondo.