Bya Ssemakula John
Buddu
Minisitule ya gavumenti ez’ebitundu mu Buganda awamu n’ekitongole kya Buganda Land Board (BLB), babangudde abaami ba Kabaka n’abamyuka baabwe ku ngeri gye basobola okweyambisaamu ettaka awamu n’okulitaasa ku baagala okulibba.
Enteekateeka eno ezingiddemu abaami okuva mu masaza okuli; Buddu, Ssese, Mawogola, Kabula ne Kkooki ng’omusomo guno guyindidde ku Maria Floor Hotel e Buddu nga gwetabiddwamu ne Minisita omubeezi owa gavumenti ez’ebitundu, Joseph Kawuki.
Mu kwogerako nabo, Minisita Kawuki yabalagidde okukola ekisoboka ettaka ly’amagombolola gaabwe baliteekeko emirimu egitali gimu egiyinza okuvaamu ssente ezisobola okuyimirizaawo ebitundu byabwe wamu n’Obwakabaka, mu kifo ky’okulireka okutwalibwa abasatuusi.
Ono yatenderezza emirimu egikolebwa ekitongole kya Buganda Land Board era n’asaba abaami b’amagombolola awamu n’abaamasaza okukolaganira awamu okusobola okutwala Buganda ku ntikko.
Owek. Kawuki era yalambuludde ku mivuyo egiri ku ttaka naddala mu bitundu bya Buganda era n’awabula gavumenti okukimanya nti mayiro si y’ereeta emivuyo era n’akakasa nti Buganda Land Board eriwo mu mateeka kuba buli kimu ekyayo ekikola mu musana.
Omukungu wa Buganda Land Board, Kizito Bashiru, yagambye nti ensisinkano eno n’abakulembeze bano ebadde yeetaagibwa nnyo mu kiseera kino eky’okutumbula empeereza n’okunyweza enkolagana wakati y’ebitongole by’Obwakabaka byonna.
Ono yasekeredde abalowooza nti ekitongole kya Buganda Land Board tekiri mu mateeka nti bakomye okusaaga kuba ebiwandiiko weebiri ebikakasa nti eri mu mateeka.
Abaami ab’amagombolola n’amasaza abeetabye mu musomo guno abaakulembeddwamu Ssaabaddu okuva mu ssaza ly’e Ssese, omwami Nalunga Bunjazi, baagambye nti omusomo guno gwabagasseeko kinene era ne bawera okukuuma ettaka lya Buganda.