Bya Ssemakula John
Mmengo
Abazadde baweereddwa amagezi okukozesa ekiseera kino eky’omuggalo okuteekerateekera obulungi abaana baabwe ebikozesebwa ku masomero bagende okugaggula nga balina entandikwa.
Obubaka buno bubaweereddwa Katikkiro w’Ebyalo bya Kabaka, Omuk. Moses Luutu bw’abadde atikkula bannakyaggwe Amakula ga Ssaabasajja mu Lubiri e Mmengo.
Abantu ba Ssaabasajja okuva mu ggombolola ya Mutuba 9 Goma mu ssaza ly’e Kyaggwe, bakedde mu Lubiri e Mmengo okukiika Embuga mu nteekateeka y’okuleeta Amakula.
Bano bakulembeddwamu omwami atwala eggombolola eno, Frederick Mulamba , ng’ali wamu n’abaami ba Kabaka n’abakulembeze mu gavumenti eyaawakati ku mitendera egyenjawulo.
Katikkiro w’Ebyalo, Omuk. Moses Luutu bw’abadde abatikkula Amakula, awadde abazadde amagezi okweyambisa ekiseera kino eky’omuggalo obulungi okweteekerateekera okuggulawo amasomero ate nga bateekateeka bulungi abaana baleme kuva ku mulamwa.
Mu ngeri yeemu, Omuk. Luutu akuubirizza bantu okwerinda abatemu abeesomye okutugumbula bannayuganda nga babeera
Mu alipoota eyanjuddwa abaami ba Ssaabasajja, baloopye Embuga ebimu ku bibasoomooza n’ebituukiddwako wabula ne bawera okuweereza Ssaabasajja awatali kumutiirira.
Bannakyaggwe bakiise Embuga n’ebintu ebyenjawulo okuli; emmere, ebisolo, ebibala n’ebintu ebirala.