Bya Ssemakula John
Kampala
Munnabyanfuna, Bulaimu Muwanga Kibirige, abadde amanyiddwa nga BMK, afudde.
Kigambibwa nti omugagga Kibirige afudde kirwadde kya kkookolo ekibadde ekyakosa ebimu ku bitundu ebyenkizo nga kino amaze nakyo emyaka egisoba mu 4.
Amawulire g’okufa kwe gakakasiddwa omukutu gwa leediyo ye eya Pearl Fm ng’eno etegeezezza nti Omugagga BMK afiiridde mu ddwaliro e Nairobi mu Kenya gy’abadde ajjanjabirwa.
Omugagga BMK, afiiridde ku myaka 67, era alese kkampuni ya wooteeri eya Hotel Africana era omwaka oguwedde aliko ekitabo kye yafulumya nga kiraga bw’asobodde okukulaakulana era nga yakituuma, “My Story of Building A Fortune in Africa” nga kyatongozebwa Katikkiro Mayiga.
Mu kitabo kino, BMK alaga olugendo lwe okuva mu kusuubula emmwanyi n’asobola okukola erinnya mu Uganda n’ensi yonna.
Okusinziira ku kitabo kino, mu mwaka 1982 bwe yali ku lugendo e Japan, omubbi yamubbako ssente eziwera emitwalo 5 egya ddoola bwe yali ku kisaawe ng’agenda e Japan.
W’afiiridde nga kkampuni ye eya Hotel Africana erina amatabi ag’enjawulo okuli n’eriri e Zambia, era badde alina n’amaduuka ga Ssipeeya mu bitundu ebyenjawulo era aliko n’ebibiina ebyenjawulo by’atandisewo, okulwanyisa endwadde n’okuweerera abaana.
Enteekateeka z’okumuziika we tukoledde eggulire lino nga tezinnafulumizibwa.
Gutusinze nnyo ayi Ssaabasajja Kabaka.