Bya Stephen Kulubasi
Njeru – Kyaggwe
Ttiimu y’essaza lya Mawokota ey’omupiira ogw’ebigere awamu n’eya Bugerere, ziyiseewo okwesogga oluzannya lwa ‘Quarter Finals’ Mawokota ewangudde omupiira gwayo bw’ekubye Kyaddondo ggoolo 2-0 ate Bugerere n’eremagana ne Kkooki ng’emipiira gyombi gibadde ku kisaawe kya Fufa Technical Centre Njeru.
Omuzannyi Mike Kintu y’ateebye ggoolo zino zombi, bw’atyo n’ayamba ttiimu ya Mawokota okugenda ku mutendera oguddako.
Omupiira guno Kyaddondo ebadde erina kuguwangula okusobola okugenda ku mutendera oguddako wabula nga nabyo bibadde byakusookera mu bibalo.
Ate mu mupiira ogwa Bugerere ne Kkooki guwedde maliri nga tewali alengedde katimba ka munne era nga wano Kkooki ebadde terina ky’ezza.
Olwaleero ekibinja Masengere lwe kifundikiddwa nga Mawokota y’ekikulembedde n’obubonero 9, Bugerere eri mu kifo kyakubiri, Kyaddondo eri mu kyakusatu ate Kkooki y’ekoobedde.
Kati Mawokota erinze okubbinkana n’anaakwata ekyokubiri mu kibinja kya Muganzirwaza ate Bugerere ettunke n’anaakulembera ekibinja kino.