Bya Musasi Waffe
Najjanankumbi – Kampala
Ekibiina kya Forum for Democratic Change (FDC) kyagala wabeewo okunoonyereza ku ali emabega w’ekyokya masomero ekigenda mu maaso mu ggwanga nga bagamba nti bitwalibwe nga butujju.
Bino byogeddwa amyuka omwogezi w’ekibiina kino, John Kikonyogo bw’abadde mu lukung’aana lwa bannamawulire n’asaba wabeewo okunoonyereza okwenjawulo kuba kulaga nti kugenderere.
“Okuva amasomero lwe gaggulwawo, tufunye okubalukawo kw’omuliro okusukka mu mirundi etaano, kino kitabudde eggwanga awamu n’abazadde.” Kikonyogo bw’agambye.
Kikonyogo agamba nti amateeka g’eggwanga gataputa obutujju ng’ebikolwa ebibi ebikolebwa okutiisatiisa bannansi n’ekigendererwa ekigezaako okubaako bye bafuna mu gavumenti oba ebitongole by’ensi yonna olw’ensonga z’ebyobufuzi, eddiini, oba ebyenfuna awatali kusosola ku ani gwe balumya oba bintu by’ani bye b’onoonye. Era bwebati bwe balaba ekyokya masomero.
FDC etegeezezza nti beewuunya okulaba nga gavumenti esobola okutwala eggye lya UPDF e Congo okulwanyisa obutujju kyokka nga mu Kampala abatujju bookya masomero.
“N’okutuusa kati tetulaba alipoota ku muliro gwa Buddo Junior School n’amasomero amalala. Wabula kye tumanyi akulira ekitongole ky’abazinyamwoto atugamba nti omuliro gwonna gubadde mugenderere, tetumanyi ani ayinza kusalawo ku nsonga eno nga tanoonyereza.” Kikonyogo bw’abuuzizza.
Bino we bijjidde ng’amasomero abiri gaakamala okwokebwa mu bbanga lya wiiki bbiri mu Kampala.
Eggulo ku Ssande, omuliro gwakutte essomero lya Bilal Islamic School era kumpi ebisulo bibiri byaweddewo awamu n’ebintu by’abayizi wabula poliisi yategeezezza ng’okunoonyereza ku kyavuddeko omuliro guno bwe kugenda mu maaso.
Wiiki ewedde omuliro gwakutte ebisulo bya Good Times Infant School e Kawaala, ne gufiiramu omwana omu.
Kikonyogo annyonnyodde nti omuliro guno tegusobola kuba nga gumala gakwata n’asaba wabeewo okunoonyereza okw’amangu ku nsonga eno era abakwatibwa ku nsonga eno bavunaanibwe butujju.