Bya Ssemakula John
Kampala
Bannanyini masomero ag’obwannannyini mu ggwanga nga bayita mu kibiina ekibagatta ekya ‘Uganda National Teachers Union leadership’ basabye gavumenti ebawe alipoota ezizze zikolebwa ku muliro oguzze gukwata amasomero okwetooloola eggwanga mu myaka 12 egiyise.
Bwe babadde awayaamu ne bannamawulire mu Kampala, bategeezezza nti gavumenti ezze alipoota zino zikuumwa nga zakyama kyokka nga kwe bandisinzidde okumanya ebyetaaga okutereezebwa.
“Alipoota zino muzanjulire ensi kuba tezirina kuba zakyama. Abantu baagala okumanya ekituufu naddala abo abafiirwa abaana baabwe mu muliro ogw’enjawulo oguzze gubaawo.” Ssaabawandiisi w’ekibiina ekitaba abasomesa ekya UNATU, Filbert Baguma bw’annyonnyodde.
Ssentebe w’ekibiina kya bannannyini masomero ag’obwannannyini, Omuk. Mike Kironde agamba nti beeraliikirivu era baagala okuzuula ekituufu ekivaako omuliro.
Wabula omwogezi w’ekitongole ekinoonyereza ku buzzi bw’emisango, Charles Twine annyonnyodde nti singa ebizuuliddwa biba nga bisobola okweyambisibwa mu kkooti ng’obujulizi, waliwo enkola erina okugobererwa okubifuna singa oli abeera abyetaaze.
“Obujulizi bulina okuterekebwa bigabanibweko ne woofiisi ya Ssaabawaabi wa gavumenti era buno busobola okuweebwayo mu lujjudde singa ekiseera kituuka nga tebusobola kutataaganya musango.” Twine bw’annyonnyodde.
Kinajjukirwa nti omuliro guzze gukwata amasomero mu myaka egiyise nga ogwasinga okumanyibwa gwe gwa Buddo Junior School ogwafiiramu abayizi abaasoba mu 20.
Wabula wadde ebbanga liyiseewo ddene ebyava mu kunoonyereza kwa poliisi ku kyavaako omuliro guno tebifulumizibwanga.