Bya Ssemakula John
Bulemeezi – Kyaggwe
Abakulira amasomero gw’Obwakabaka okuli Bbowa Vocational Secondary School erisangibwa e Bulemeezi mu Luweero ne Kasawo Vocational Training Institute mu Kyaggwe, bawanjaze eri Obwakabaka bubayambe ku basaatuusi abeesomye okubamalako ettaka okuli amatendekero gano ekizing’amizza enkulaakulana yaago.
Bano okwogera bino babadde mu ensisinkano n’akakiiko akavunaanyizibwa ku byenjigiriza mu lukiiko lwa Bugandà mu nteekateeka yaako gye kaliko ey’okulambula amasomero gw’Obwakabaka okulaba engeri gye gatambuzaamu emirimu .
Akulira Bbowa Vocational Secondary School, James Lubowa ategeezezza akakiiko kano nti basobeddwa okukozesa ettaka ly’essomero lino n’okuliteeka ku mutindo ogusaabidde olw’abasaatuusi bano ng’obudde bungi babumala mu kukaayana nabo.
Lubowa agamba nti ku bbanga essomero lino lye limazeewo bandibadde n’abayizi abasinga be balina wabula bakyasoomoozebwa ebizimbe nga balina bitono n’asaba akakiiko okubongera ku nsimbi bongere ku bizimbe by’essomero lino.
Ono ebigambo bye bikwataganye n’ebyakulira ettendekero lya Kasawo College of Business and Technical Education, David Mwesigwa ng’ono asabye Buganda okusitukiramu kuba ettaka ly’essomero lino liggwaawo.
Akulira akakiiko k’ebyenjigiriza mu Bwakabaka, Owek. Nakate Kikomeko Birabwa Cotilda bano abasuubizza okukola ku nsonga zino kisobozese okuteekawo omwagaanya okutaasa ebyenjigiriza naddala mu Bwakabaka.
Ono asabye abakulira amasomero n’amatendekero gw’Obwakabaka obutakkiriza muntu yenna kusagira ku ttaka lya Kabaka era buli lwe wabaawo gwe beekengera ensonga bazituuse mangu ku bavunaanyizibwa ku nsonga.