Bya Jesse Lwanga
Mukono
Ssettendekero wa Uganda Christian University asangibwa e Mukono asse omukago ne kkampuni ya Prime Media Network okulongoosa n’okukyusa endabika y’ettendekero lino lyonna, ng’omulimu gwonna gwakuwementa obuwumbi bwa ssiringi 4.
Enteekateeka eno etuumiddwa ‘Land Scaping and Beautification of the Campus’ era nga yaakutandika mu mwezi ogujja ogwokubiri okwongera okutumbula ekifaananyi ky’ettendekero lino gutuukana n’omutindo gwe liriko.
Bw’abadde ayogera ku mukago guno, Omumyuka wa Cansala w’ettendekero lino, Prof. Aaron Mushengyezi, asabye amatendekero n’ebitongole ebyenjawulo okweyuna bannamikago babayambe okwongera okukulaakulana nga babakwasizaako.
Prof. Mushengyezi agambye nti ebitongole oba amakumpuni okukula wano mu Uganda ne Africa yonna, gateekeddwa okuba ne bannamikago okusobola okutuukiriza enteekateeka zaago.
Okusinziira ku Prof. Mushengyezi, mu mukago guno bagenda kukyusa endabika ya Wankaaki w’ettendekero lino, enguudo abayizi mwe bayita, okuteeka amataala okwetooloola ettendekero lino, ekifo awaliirwa emmeere, ekifo awawummulirwa, okukyusa poliisi eri mu ttendekero lino n’ebirala bingi.
Ono yagambye nti ensimbi zonna ezigenda okukola bino, ziri mu mukago gwe bakoze nga tewali ngeri yonna gye kigenda kukosaamu bazadde oba abayizi kuba tebagenda kwongeza bisale.
Ssenkulu wa Prime Media, Brutus Kajingo, ategeezezza nti kino bakikoze okuyambako era ne baagala abayizi okukozesa ebintu bino munda mu ttendekero mu kifo ky’okubirumba wabweru.
Agasseeko nti kino kigenda kuyamba okusembereza abayizi empeereza ey’omulembe era kiyambeko n’abayizi okufuna amangu bye beetaaga.