Bya Francis Ndugwa
Masaka
Kamalabyonna wa Buganda, Charles Peter Mayiga, akubirizza abantu obutaggwaamu ssuubi newankubadde ng’embeera eriwo ya kusoomooza naddala mu by’obufuzi nga abeesimbyewo ab’enjawulo banoonya okuwangula akalulu ka 2021.
Okwogera bino, Owek. Mayiga, abadde mu kuziika taata wa Mukyala w’Owek. Joseph Kawuuki, Dr. Matovu Lukaaga Joseph, leero ku kyalo Nkoma mu muluka gw’e Buyaga mu ggombolola ya Mutuba ena Kawuga mu ssaza ly’e Buddu.
“Okwekubagiza, okwesaasira kya bulabe ne mu biseera bino bye tulimu eby’obunkenke, tulina okwewala okuggwamu essuubi.” Owek. Mayiga bw’agambye n’asaba abakungubazi, Dr. Matovu abafuukire essomo.
Katikkiro Mayiga agambye nti mu nsi abantu tebafuna bibagwanidde wabula bafuna ebyo bye balwanirira era ng’eno y’engeri Dr. Matovu gye yatandikamu eddwaliro wakati mu kwefiiriza.
Owek. Mayiga asabye abantu bulijjo okwerwanako balengerwe mu kifo ky’okuddawo okwekubagiza n’okwesaasira, kuba kino kibafeebya era nga kino kyeyolekera bulungi mu bulamu bw’omugenzi.
Atenderezza omugenzi olw’okubeera n’omwoyo gwa Buganda ogutafa kubanga ono yeenyigira nnyo mu lutabaalo lw’okunoonya ettoffaali wamu n’enkola y’Oluwalo.
Wabaddewo okuyimba ekitambiro kya Mmisa ekikulembeddwamu bwanamukulu w’ekigo ky’e Namugongo era omwana mu maka gano, Fr. Vincent Lubega.
Katikkiro n’omukyala bawerekeddwako Owek. Christopher Bwanika n’Owek. Noah Kiyimb, abaami b’amasaza n’abakungu abalala okuva mu Bwakabaka ne bannaddiini.
Jjajja Allan Nakirembeka Waliggo asinzidde eno n’asaba abazzukulu okunywerera ku bannaabwe era banyweze obumu ku nsonga ezibaliisa akakanja.
Eng. Waliggo alabudde ku bikolwa by’okutulugunya abazzukulu n’eryanyi erusukkiridde era n’ebyo ebikendeeza obulamu bw’abazzukulu nti, birina okwewalibwa ng’embeera tennatabuka.
Ono yayogedde ku mugenzi ng’omuntu abadde omwesimbu, omukozi, omukakalukanyi, abadde tatuma wabula nga yeesitukira ku nsonga yonna gy’abadde ayagala.
Ate Namwandu Sarah Nalumansi Lukaaga n’abaana, boogedde ku mugenzi ng’abadde omwami era taata ayagala ennyo famire ye, akaseera konna.
Dr. Joseph Matovu Lukaaga abadde atawanyizibwa bulwadde bwa kkookolo w’omugongo era ng’afiiridde ku myaka 65.