Kamwokya
Poliisi ewalirizddwa okukuba Ttiyaggaasi n’amasasi okutangira abavubuka b’ekibiina ki ‘National Resistance Movement (NRM) naba National Unity Platform-(NUP) okubatangira okweggwa mu malaka mukulonda kw’abavubuka ku byalo.
Kalumanywera okusinga yabadde mu Zzooni ya Kifumbira A ne Kifumbira B e Kamwokya ng’ eno okulonda kw’eggulo tekwawedde bwekutyo nekuddibwamu leero ku Lwokubiri.
Ebifo bino byombi biri ku ssomero lya Homisdallen Primary School e Kamwokya mu Kampala.
Omu ku balonzi mu Kifumbira B Alex Mugisa, ategeezezza nti embiranye bwebadde wakati wa munna NRM Philip Olobo ne munnakibiina ki NUP Edward Mujeza, nga bano eggulo basibaganidde ku bululu 55 buli omu.
Enjuyi zombi zagaanye ebyavudde mu kalulu era okukakana nga okulonda e Kifumbira B kuyiise. Ate mu Kifumbira B olukalala lw’abalonzi lwabiddwa ekintu ekyawalirizza abalondesa okuddamu okutegeka okulonda kuno ku makya ga leero ku Lwokubiri.
Eby’okwerinda byakedde kunywezebwa poliisi, era okulonda nekuddamu wabula obwedda abawagizi ba NUP balumiriza aba NRM okukozesa poliisi okugaana abalonzi babwe okutuuka awalonderwa.
Kino kitabudde embeera ekiwalirizza poliisi okukozesa ttiyaggaasi n’amasasi okukakkanya abavubuka, olwo dduka dduka naddamu ekiwalirizza aba LDU n’Amajje okuleetebwa bayambe ku poliisi olwo embeera neteleera era okulonda nekuddamu.
Oluvanyuma owa NRM Philip Olobo, alangiriddwa ku buwanguzi bwafunye obululu 67 ate ye Edward Mujeza nga alina 64.
Bino aba NUP olubitegedde nebatambula nga balumba ababadde balondera ku Kifumbira A wabula poliisi nebatangira ekintu ekizzeemu okutabula embeera.
Wetukoledde eggulire lino nga okulonda kukyagenda mu maaso mu Kifumbira A.
Okusinziira ku batunuulizi b’ensonga, okulonda kw’abavubuka wonna mu Ggwanga kubaddemu emivuyo mingi ekiwalirizza poliisi okuyingirawo etaase embeera.
URN