Bya Ssemakula John
Bugoloobi – Kyaddondo
Akulira kakuyege n’okunoonyeza ekibiina ki National Resistance Movement (NRM) obuwagizi, Rosemary Nansubuga Sseninde alabudde abavubuka okukomya okwekwasa Pulezidenti Yoweri Museveni ku bwavu obubagoya.
Okulabula kuno Sseninde yakukoledde mu katale e Bugoloobi bweyabadde ayogerako n’abasuubuzi ku Lwokubiri nga abalambula okuzuula ebizibu byebasanga nga bakola emirimu gyabwe.
“ Obwavu obusanga mu Bayibuli ne Kuraani ebyaliwo nga ne gavumenti ya NRM tenajja mu buyinza. Temutwala bannabyabufuzi bye babagamba, Ebiwandiikibwa ku mutimbagano si bituufu. Omuntu bwaba alina ssente nazisaasaanyiza mu zzaala talina kunenya Museveni, ekizibu kiri ku ye, ” Ssenninde bwe yategeezezza.
Okusinziira ku Sseninde okuvuunuka ekizibu ky’obwavu kubeera kwerwanako ng’omuntu n’okyuusa endowooza yo okuleetawo enkyukakyuka.
Ono agamba nti wadde gavumenti erina obuvunaanyizibwa okulaba nti abantu baayo bali bulungi naye yo kyekomako kwe kuteekawo embeera esobozesa abantu baayo okunoonya ssente beggye mu bwavu.
Sseninde, abasuubuzi abasabye okweyambisa enteekateeka ez’enjawulo nga Entandikwa, Emyooga, Parish Development Fund, ekitavvu ky’abavubuka n’abakyala ekyateekebwawo gavumenti beeyimusa bave mu by’okwekwasa gavumenti.
Ono agamba nti gavumenti tesobola kuwa buli omu ssente naye esobola okuziteeka mu SACCO nebazeewola n’oluvannyuma nebazizza.
Sseninde yalaze nga bwagenda okwanjula ebizibu byonna byasanze mu basuubuzi bano eri bekikwatako mu gavumenti basobole okubisalira amagezi, enkulaakulana esobole okubatuukako.