Bya Ssemakula John
Kampala
Poliisi erabudde nti tegenda kukkiriza muntu yenna kukozesa lulimi luvvoola eri omulala ng’ayita ku mutimbagano n’eraga nti abantu nga Munnamateeka Isaac Ssemakadde gwe bagamba nti si wa kitalo okuvvoola abalala ng’agamba nti akozesa ddembe lye erimuweebwa Ssemateeka.
Ku kino omwogezi w’ekitongole kya poliisi ekibuuliriza ku buzzi bw’emisngo, Charles Twine agamba nti bayise Ssemakadde okubuuzibwa ku by’okukozesa olulimi oluvvoola wamu n’okwezinga ku Mulamuzi Musa Ssekaana owa kkooti enkulu awamu n’abakungu ba gavumenti abalala.
Poliisi era egamba nti abantu abamu bavudde ku nkola ennungi ey’okugonjoola obutakkaanya ne badda mu kwonoona amannya g’abalala naddala abakozi ba gavumenti. Ebikolwa bino ku bantu poliisi b’egamba nti babeera bakola mirimu gyabwe birina okuvumirirwa.
Abakuumaddembe beebuuza ebigendererwa by’abantu bano era ne balabula nti buli muntu akola bino agenda kusisinkana omukono gw’amateeka annyonnyole ebigendererwa bye.
“Tosobola kuzuukuka ku makya n’ovuma Sipiika, n’ovuma omulamuzi oba omukulembeze w’eggwanga. Tetusobola kubakkiriza era abamu tubawulidde nga bagamba nti ddembe lyabwe okuvuma abantu abalala nga babayita abasiru.” Twine bw’agasseeko.
Poliisi egamba nti wadde bannansi balina eddembe lyabwe mu nnyingo ya Ssemateeka eya 43 naye ate tebakkirizibwa kulinnyirira ddembe lya balala era kiswaza bwekikolebwa ku bakulira ekitongole ekiramuzi kyennyini, tosobola kubeera Munnamateeka ate n’ovuma abalala.
Bano bagamba nti bajja kwekebejja emitwe gy’abo abagambibwa okuvvoola abalala bwekizuulibwa nti balamu olwo basobole okusimbibwa mu kkooti babitebye.
Twine era alabudde abantu ku mitimbagano okwewala okusaasaanya obubaka buno kuba basobola okwesanga nga nabo omukono gw’amateeka omuwanvu gubatuuseeko.