Bya Ssemakula John
Buloba – Busiro
Minisita w’Ebyobulamu , enkulaakulana y’Abantu era avunaanyizibwa ku byenjigiriza mu Buganda atandise okulambula amasomero g’Obwakabaka mu kaweefube w’okwongera okutumbula ebyenjigiriza n’embeera z’abayizi mu Buganda.
Owek. Nankindu obulambuzi buno abutandikidde ku ssomero lya Lubiri High ettabi erye Buloba era wano wasinzidde neyeebaza Ssaabasajja Kabaka Ronald Muwenda Mutebi II olw’okussa ebyenjigiriza ku mwanjo okugunjula abaana be ggwanga naddala nga akwasizaako abazadde abateesobola.
” Okutwaliza awamu tulambula amasomero ga Ssaabasajja Kabaka okulaba nti ebyo oba ebibeera byayisibwa mu mbalirira biteekebwa mu nkola era n’ensimbi ezaayisibwa okulaba nti zikola ekyo kyennyini ekyagendererwa. Nga bwemumanyi emirimu gy’Obwakabaka gikolebwa ku ssente ntono ate ku mutindo omulungi,” Minisita Nankindu bw’akakasizza.
Minisita alambuziddwa embeera ebibiina mwebiri, woofiisi n’emirimu emirala egikolebwa mu ssomero lino era wano abadde wamu nakulira essomero lino David Namugera nabalala.
Owek. Nankindu ategeezeza nti kino kigendereddwamu okulondoola entambuza y’Emirimu nokukakasa nti emirimu gikolebwa n’Obukugu abayizi basobole okufuna obuweereza obutuukiridde olwo Buganda esobole okudda ku ntikko .
Minisita Nankindu agamba nti amaanyi Beene gaatadde mu byenjigiriza gasobozesa abaana bangi abava mu maka amanaku okufuna omukisa okuyigirizibwa nga ayita mu nsawo ya Kabaka Education Fund ekwasizaako abayizi abeetaavu.
Akulira essomero lino David Namugera annyonyodde nti enkola eno egatta ettofaali ddene ku nkulaakulana y’Esomero olw’amagezi nokuwabulwa okwenjawulo ebibaweebwa nga kino kiyamba okubaako ebitereezebwa essomero nerisobola okugenda mu maaso.