Bya Musasi waffe
Kakeeka – Mengo
Minisita w’ebyenjigiriza, enkulaakulana y’abantu awamu ne woofiisi ya Nnaabagereka, Owek Chotilda Nakate Kikomeko aggaddewo empaka z’abaana b’amasomero eziyindidde ku ssetendekero lya Ssaabasajja li Muteesa I Royal University nga zino zetabiddwamu amasomero 6 ku mutendera gwa pulayimale ne siniya wansi w’omulamwa “Twetaase okukozesa ebiragalagala”.
Empaka zino zaatekebwawo Obwakabaka n’ekigendererwa eky’okutumbula ebitone mu baana nga bwebayiga wamu n’okuzimba obumu. Amasomero ageetaba mu mapka zino gabeera gakaayanira Ngabo wabula obutaawukanako na mwaka guwedde, amasomero Clever’s Origin Junior School ne Kisubi Mapera SSS era gegasitukidde mu Ngabo eno egenda okugakwasibwa nga 29 omwezi guno.
Bwabadde aggalawo empaka zino, Owek. Nakate yebaziza abetabye mu mpaka zino z’agambye nti ziggyayo bulungi ebiruubirirwa ebiri mu emu ku nnyingo z’ensonga za Buganda ssemasonga ettano ng’eno y’eyobumu, obuyiiya, okukola n’okukola, obunyiikivu, n’obwerufu.
Owek. Nakate awerekeddwako abakungu okuva mu minisitule y’ebyenjigiriza mu Bwakabaka okuli ssentebbe wa bboodi y’ebyenjigiriza, Omuk. Deborah Zzawedde, Omukwanaganya w’ebyenjigiriza, Omuk. Nakimuli Leticia n’abakozi abalala.