Bya Gerald Mulindwa
Bulange
Omumyuka Asooka owa Katikkiro Prof. Twaha Kaawaase Kigongo, ategeezezza nti obwavu obuluma abantu mu Buganda tebusosola mu ddiini, langi wadde ebibiina by’ebyobufuzi.
Okwogera bino Kaawaasa abadde atongozza boodi y’ekitongole ki ‘Buganda Culture and Development Foundation (BUCADEF)’ empya ku Lwokubiri e Bulange – Mmengo.
“Bwewetoloola Buganda eno olaba abantu baffe nga obwavu buyitirivu, endwadde tezaawula, obutamanya nabwo tebwawula,” Kaawaase bweyagambye.
Ono alaze emiramwa okwazimbira ekitongole ki BUCADEF omuli; okukuuma eby’obuwangwa n’ennono, okusitula embeera z’abantu ba Buganda wamu n’okubeera n’ensimbi.
Oweek. Kaawaase anyonyodde nga ekitongole kino bwekiri ekisaale mu kutumbula embeera z’abantu mu bulamu obwa bulijjo era nabasaba okutegeera amasiga Obwakabaka kwebuyimiridde.
“Tosobola kubeera ku boodi ya BUCADEF okugiddukanya nga totogedde bwakabaka kyeki kubanga ojja kulemwa okutegeera ebigendererwa bya BUCADEF. Olina okutegeera amasiga kwetuyimiridde, ” Oweek. Kaawaase bwagasseeko.
Ate ye Minisita Hajjati Mariam Mayanja Nkalubo yeebazizza boodi enkadde olw’okukola omulimu ogwagiweebwa era nasuubizza nga minisitule ye bwegenda okubayamba okulaba nga omulimu gwanguwa.
Boodi empya ekulirwa Engineer Ishak Lukenge, Dr. Gorette Nabanoga amyuka Ssentebe, abalala kuliko; Mw. Tyaba Bazilio, Prof. Yefusa Kitungulu Zaake, Mw. Luyimbazi Nalukoola, Dr. Emma Naluyima, ne Mw. Saul Kaye
Ssentebe omuggya Ishak Lukenge, yeebazizza Ssaabasajja Kabaka okusiima nabalonda okukulembera boodi eno.
Ono ategeezezza nti BUCADEF gwe mutima gwa Buganda kubanga yesuubirwa okukyusa obulamu bwa bantu ba Buganda era nawera okutuukiriza obuvunaanyizibwa obwamuwereddwa.