Bya Francis Ndugwa
Bulange – Mmengo
Minisita w’ebyenfuna era Omuwanika w’ eggwanika lya Buganda, Owek. Robert Waggwa Nsibirwa ategeezezza nti abantu ba Buganda bongedde okujjumbira enteekateeka z’okulaakulanya Obuganda nga bawaayo ensimbi mu nteekateeka y’Oluwalo okusobola okuwagira enteekateeka za Beene.
Alipoota omuwanika agiweeredde mu Bulange e Mmengo ku Lwokubiri mu lukung’aana lwa bannamawulire olwetabiddwamu ne minisita omubeezi owa gavumenti ez’ ebitundu Joseph Kawuki.
Owek. Waggwa Nsibirwa ategeezezza nti mu luwalo lw’omwaka 2022 basobola okukungaanya ensimbi eziwera akawumbi kamu n’emitwalo 90 wansi w’enteekateeka y’ Oluwalo lwaffe nga zino zakungaanyizibwa nezisengekebwa okusinziira ku masaza n’eggombolola eziri mu Buganda n’ebweru waayo.
Okusinziira ku Owek. Waggwa Nsibirwa ensimbi zino zisaasanyiziddwa ku bintu ebyenjawulo mu bwakabaka era Katikkiro Mayiga bweyali aggalawo Oluwalo lw’ omwaka 2022 yalagira eggwanika okufulumya ensaasaanya y’ensimbi zino okusobola okunyweza ennyingo y’ obwerufu.
Omuwanika agamba nti ensimbi zino zizze zirinnya mu myaka ag’enjawulo nga mu 2017 bakung’aanya obukadde 202, mu 2018 nebafuna obukade 414, 2019 obukadde 515, 2020 obukadde 352,2021 obukadde 654 ne 2022 akawumbi kalamba n’emitwalo 90.
Owek. Nsibirwa annyonnyodde nti Obukadde 60 bwawagira okulwanyisa mukenenya mu bwakabaka, ate obukadde 100 nebusibwa ku mulimu gw’ okuzzaawo Muzibwazaalampanga. Ekitongole kya Beene ekya Kabaka Education Fund bakiteekamu obukadde 76 ate Emmwaanyi Terimba nebagiwa obukadde 283 n’emitwalo 72.
Ono agasseeko nti omulimu gw’okuwa abantu amazzi amayonjo nga bayita mukusima enzizi baziteekako obukadde 39 nga zino zaava mu ssaza lya Rocky Mountains mu Amerika.
Minisita Nsibirwa agamba nti emirimu gy’ Embuga bagiteekako obukadde 71 nemitwalo 41 mu 7000m so nga okusembeza abagenyi ba Nnyinimu mu Bulange kwatwala obukadde 210 n’emitwalo 56. Ensimbi obukadde 93 n’emitwalo 45 mu lukumi zazzibwaayo ku Ggombolola ate amasaza ga Beene omuli Ankole, Mbale, Busia Malaba Tororo ne Busoga gaweebwa obukadde 13 emitwalo 57 mu lukumi..
Owek. Waggwa agamba nti waliwo obubonero bungi obulaga nti abantu ba beene bongedde okusiima enteekateeka eno mu bikolwa kubanga ebisinga bibaganyula buteerevu nga mu nkola eno Obwakabaka bwakasima enzizi 671.
Ye Minisita omubeezi owa Gavumenti ez’ ebitundu, Owek. Joseph Kawuki ategezezza nti oluwalo luyambye okuzimba obukulembeze n’okukola ennyo mu bantu ba Kabaka kubanga ku mitendera gyonna abantu balwetabamu butereevu.