Bya Shafik Miiro
Bulange – Mmengo
Omusomo gw’Obuwangwa n’Ennono 2025 gutongozeddwa mu Bulange e Mmengo ku Lwokusatu wansi w’ omulamwa, “Amaka y’Emmerezo y’Obuntu”
Bw’abadde atongoza omusomo gw’omwaka guno, Katikkiro Charles Peter alaze obwenyamivu olw’abantu okuggwamu obuntu nga beenyigira mu bikolwa ebikosa abalala, ebyesitazza era ebitayamba ggwanga.
Kamalabyonna Mayiga yeebazizza Abataka Abakulu Ab’Obusolya olw’omulamwa gw’agambye nti mukulu ddala.
Owek. Mayiga akunze Obuganda okwetaba mu musomo ogunabaawo mu mwezi ogw’ekkumi nga 24, era akikaatiriza nti omuntu ayitibwa omumanyi, y’oyo afaayo okwongera okuyiga.
Asabye abantu okufaayo okujjukizibwa eby’omuwendo ebyo ebyabazaalirwamu nga bwe buwangwa n’ennono.
Omukubiriza w’Olukiiko lw’Abataka, Omutaka Nnamwama Augustine Kizito Mutumba ategeezeza nti nga basinziira ku mulamwa guno baagala okujjukiza abazzukulu obukulu bw’amaka mu Buganda, era okulaga obukulu bw’amaka mu kuzimba obuntu n’okunyweza Eggwanga.
Ku lwa Minisita w’Obuwangwa n’Ennono, Owek. Israel Kazibwe Kitooke yeebazizza nnyo Bajjajja olw’enteekateeka y’omusomo n’olwokuguteekangawo buli mwaka.
Yeebazizza olw’ omulamwa gw’agambye nti gulimu amakulu mangu naddala okunnyikiza empisa n’obukozi mu baana, okunyweza obuwangwa.
Owek. Kitooke agamba nti ng’Abakulu b’Ebika bwe baakuuma Buganda ng’Obwakabaka buggyiddwawo naye obuwangwa ne busigala nga butojjera, ne ebiseera bino era balina okusigala nga mpagi nkulu mu kunyweza Obuwangwa n’Ennono zaabwe Buganda.
Enteekateeka y’okutongoza omusomo guno yetabiddwako Abataka Abakulu Ab’Obusolya ab’enjawulo, Omukubiriza w’Olukiiko lwa Buganda Owek. Patrick Luwaga Mugumbule, Baminisita ba Kabaka; Owek. Israel Kazibwe Kitooke, Owek. Robert Serwanga n’Abazzukulu okuva mu bika eby’enjawulo.