Bya Betty Namawanda
Lwengo – Buddu
Ekikangabwa kibuutikidde abatuuze ku kyalo Kyabbogo mu muluka gwe Nkoni muggombolola ye Kkingo mu disitulikiti ye Lwengo, Omusomesa w’eddiini ow’emyaka 61 bwakubiddwa omuyini ku mutwe nafiirawo.
Eyatiddwa ye Richard Mbaziira myaka 61 ng’abadde musomesa wa Ddiini mu kisomesa Kya Kkingo mu Lwengo.
Kigambibwa nti ono yatemuddwa mu kiro ekyakeesezza ku Lwokubiri era abatuuze bagamba nti okusinziira ku kyebalabye, abatemu olwamaze okumutta nebamusuula mu lusuku era nga bamuziiseeko ekitundu ekya waggulu.
Ssentebe wa ggombolola ye Kkingo, Aloysious Kibira agamba nti basula kutebuukye kuba ettemu lizzeemu mu kitundu kyabwe nasaba poliisi ekole okunnoonyereza ku bikolwa bino ebyeyongera buli lukya.
Ate ye Ssentebe w’ekyalo Kyabbogo, Kabi Ssenkatuuka, yategeezezza nti omugenzi tabadde muntu w’amasanyu era ng’okufa kwe kubakubye wala bwatyo nakuutira abantu okwongera okwekuuma.
Wabula adduumira poliisi mu bendo-bendo lye Masaka Paul Nkore yasabye abantu okwewala okugenda mu mabaala ekiro era nabakunga okukwatagana ne poliisi okumalawo obutemu buno.
Ye adduumira poliisi ye Lwengo Francis Okongo yasabye abatuuze okwewala okunywa ennyo omwenge.
Oluvannyuma poliisi etutte omulambo gwa Mbaziira mu ddwaliro e Masaka okwongera okugwekebejja.