Bya Ssemakula John
Ndejje – Kampala
Omulangira David Kintu Wassajja asabye amasomero n’abazadde okuleka abaana betaayize mu buwangwa n’ennono zaabwe awatali kukugirwa, kiyambe amawanga gaabwe okuyitimuka.
Bino omulangira Wassajja abyogeredde ku Aiden College School gyabadde omugenyi omukulu ku mukolo essomero lino kwerijagulizza okuweza emyaka 25 bukya litandika e Ndejje ku Lwokutaano.
Omulangira Wasajja era akalaatidde amasomero gonna mu ggwanga okwagazisa abayizi ennimi n’obuwangwa bwabwe kibayambe okukula nga bamanyi ennono zabwe bwezitambula era bazisinzireko okulaakulana.
Ono yeebazizza omutandisi w’essomero lino Omw. Ssempala Kigozi Ssajjalyabeene olw’obuweereza bwe eri Namulondo wamu n’okuteeka ettofaali ku kisaawe ky’ebyenjigiriza.
Omukolo gw’atandise n’ekitambiro kya mmisa ekiyimbiddwa omubaka wa Paapa eyawummula Ssabasumba Augustine Kasujja nga ali wamu ne bannadiini abalala.
Kasujja akubirizza abaana okusoosowaza Katonda mu buli kyebakola wamu n’okufaayo ennyo ku kyabatwaala ku ssomero.
Mu kwogera kwe, Ssempala Kigozi asabye abazadde obutasuulirira baana nga ku masomero nga balinga abalowooza nti essomero ly’eririna okubakolera buli kimu.
Ono era asoomozezza abatandika amasomero kyokka abaana bwabwe nebabatwala mumasomero amalala, nagamba nti kano kabonero ak’enkukunala nti amasomero ago tegabeera ga mutindo
Omukolo guno gwetabiddwako abakulembeze omuli, Betty Ethel Naluyima n’abalala nebatendereza Sempala Kigozi olw’okubaako kyagatta ku by’enjigiriza mu ggwanga nga ayita ssomero lino.