Bya Ssemakula John
Kibuli – Kyaddondo
Omulangira Kassim Nakibinge Kakungulu asabye gavumenti ebeeko kyekola ku bbeeyi y’ebintu eyeekanamye awamu n’emiwendo gy’amafuta egyeyongera okulinnya buli ddaakika kisobozese bannayuganda okweyagalira mu nsi yabwe.
Okusaba kuno Omulangira Nakibinge akukoledde mu kugabula ekijjulo kya Eid kyeyategese Kibuli ku Mmande.
“Ebijambiya e Wakiso ne Nansana, tusaba muzuule abali emabega wabyo. Muzuule abantu abatemula bannayuganda mu bitundu bya Kampala eby’enjawulo . Mutuyambe mukwate abali emabega w’ebikolwa bino,” Omulangira bwe yasabye.
Jjajja w’Obuyisiraamu Nakibinge era asabye gavumenti ennoonyereze ku muliro ogukwata amasomero mu ggwanga era nakuutira abayisiraamu okusigala nga bakuuma emirembe.
Omulangira Nakibinge yagambye nti abayisiramu bonna beetegefu okwegatta singa wabeerawo enkola enung’amu ezigobererwa nga zesigamizibwa ku kugonjoola ekyabaviirako okwawukana.
“Mwenna mumanyi nti obukulembeze bw’obuyisiraamu mu Uganda tebuli wa mukulembeze omu era ekyo si kipya era mumanyi nti waaliwo ensonga ezatuleetera okwawukana n’ensonga ezo tetujja kuzitereeza nabannakigwanyizi n’obulimba naye tulina okutunuulira ddala zaava ku ki era tuzitereeza tutya tusobole okugenda mu maaso,” Omulangira Nakibinge bwe yategeezezza.
Wabula Omulangira abagenda ewa Pulezidenti yabasabye bweba bakola eky’okubunyisa enjiri y’obumu nga bwebasuubiza nga tebasojjeza bannabwe okwewala okwongera okutematema mu bayisiraamu.
Ye Supreme Mufti, Muhammad Shaban Galabuzi yasabye gavumenti obutateeka mmwaanyi mu mikono gya Musigansimbi eyalemereddwa okumaliriza eddwaliro lye Lubowa, era nalaga obwetaavu okuddamu okwetegereza endagaano eyakolebwa kuba tegasa balimi ba mmwaanyi.
Galabuzi yawadde gavumenti amagezi endagaano eno gyeyakola ne kampuni ya Vinci egisazeemu kuba terina kalungi kegenda kuwa balimi ba mmwaanyi mu ggwanga.
Omumyuka asooka owa Katikkiro, Prof. Twaha Kaawaase Kigongo, yakuutidde abalimi obutaggwamu maanyi basigale nga balima emmwaanyi kuba ebiriwo kati bigenda kuyita mu kaseera katono nnyo.
Oluvannyuma Omulangira Nakibinge yagabudde abagenyi be nga omukolo gwetabiddwako ebikonge ebyenjawulo okuli n’omubaka wa America mu Uganda Amb. Natalie Brown.