Bya Ssemakula John
Kampala
Omubaka omulonde owa Busiro North era munnakibiina kya National Unity Platform (NUP), Paul Nsubuga, asimbiddwa mu kkooti n’avunaanibwa omusango gw’okubba essimu ebalirirwamu emitwalo 8 egya Ssiringi.
Nsubuga ow’emyaka 29 asimbiddwa mu kkooti ya Buganda Road ey’eddaala erisooka, Doreen kalungi n’avunaanibwa. Wabula ono emisango agyegaanye.
Kino kiddiridde poliisi okutegeeza nti yabadde ekutte omubaka Nsubuga oluvannyuma lw’obutambi okusaasaanira omutimbagano obulaga omubaka ono ng’abba essimu ku bamu ku bawala abaali mu dduuka mu Kampala.
Oludda oluwaabi lulumiriza nti nga 3/06/2020 Nsubuga omutuuze w’e Nansana mu Wakiso disitulikiti bwe yali e Nakasero ku Ssemaduuka wa Shoprite, yabba essimu y’ekika kya Itel ebalirirwamu emitwalo 8 eyali eya Nicholas Karuhanga.
Kkooti era etegeezeddwa nti ku nnaku z’omwezi ze zimu era e Nakasero, Nsubuga yabba ssente obukadde 4 n’ekitundu okuva ku Nicholas Karuhanga.
Ono ayimbuddwa ku kakalu ka kkooti ka mitwalo 4 ez’obuliwo ate abamweyimiridde okuli ne Jjajja we, Charles Kasozi ow’emyaka 72, Mmeeya wa Kakiri Town Council ne maama we omuto Santrina Namuli buli omu n’asabibwa akakadde ka ssente ezitali zabuliwo.
Ono alagiddwa okudda mu kkooti nga 29/03/2021 okuddamu okuwulira omusango gwe era nga kisuubirwa nti poliisi ejja kuba emalirizza okunnoonyereza ku nsonga ye.
.