Bya Francis Ndugwa
Masaka – Buddu
Ababaka ba Palamenti okuli Muhammad Nsereko owa Kawempe North ne Allan Ssewanyana owa Makindye West bazziddwayo ku alimanda mu kkomera e Kigo okutuuka nga 10 omwezi ogujja ogwa March omusango gwabwe lwe gunaddamu okuwulirwa.
Bano babadde basuubirwa okusindikibwa mu kkooti enkulu ewuliriza emisango gy’obutemu n’obutujju egyabaggulwako.
Wabula omuwaabi wa gavumenti, Richard Birivumbika ategeezezza Omulamuzi Christine Nantege owa kkooti esookerwako e Masaka nti okunoonyereza ku musango gwabwe bwe gukyagenda mu maaso era alina n’empapula z’abadde taleese n’asaba ayongerwe akadde.
Munnamateeka wa bano, Shamim Malende kino akiwakanyizza n’alaga nga bwe waliwo obuzannyo obugenda mu maaso mu musango guno n’ekigendererwa eky’okukuumira abantu bano mu nkomyo.
“Emizannyo gya gavumenti gizannyiddwa era ky’ova olaba nti ne kkooti egambye nti bw’oba ogamba nti empapula tozireese kati nga 10, March olina okujja n’empapula ezikakasa nti obujulizi obuluma abantu bano mu bulina basindikibwe mu kkooti enkulu.” Malendeb bw’ategeezezza.
Malende agamba nti basabye kkooti etunule mu mbeera y’ababaka bano ey’ebyobulamu kuba teri bulungi ate tebafunanga bujjanjabi ate nga n’abaana baabwe bakyali waka olw’ensonga bazadde baabwe be balina okuteekako omukono bwe kituuka okuggyayo ssente.
Okusinziira ku Malende, ababaka bano balina fayiro 2 wabula ziriko emisango egiwera musanvu okuli; obutujju, okuvujjirira obutujju, obutemu obwenjawulo awamu n’emisango emirala. Ono agamba nti fayiro emu yaggwa n’esindikibwa mu kkooti enkulu nga kati bawerennemba ne fayiro eyookubiri eyabaggulwako oluvannyuma lw’okukwatibwa nga baakamala okuyimbula ku kakalu ka kkooti.
Bino we bijjidde nga Maama w’omubaka Ssegiriinya Muhammad abadde akedde okugumba ku Palamenti nga yeemulugunya ku bbanga mutabani we ly’amaze mu kkomera ono wadde poliisi egezezzaako okumuwooyawooya naye yeeremye okuvaawo.