Bya Maria Gorreth Namisagga
Mmengo – Kyaddondo
Obwakabaka bwa Buganda bugaddewo omwaka gw’Oluwalo 2025 ku mukolo oguyindidde mu Bulange e Mmengo.
Enkola ya Luwalo Lwaffe, abantu ba Buganda mwe bayitira okuwaayo ensimbi ezitambuza emirimu gy’Obwakabaka, bano nga bayita mu ggombolola ezikola amasaza baweebwa ennaku ez’enjawulo eggombolola n’amasaza mwe galina okuweerayo oluwalo era leero lwe lunaku olusembyeyo mu 2025 nga bajja kuddamu okukiika mwaka gujja.
Katikkiro Charles Peter Mayiga y’atikkudde oluwalo luno olusembyeyo mu mwaka 2025 era yebazizza abantu ba Ssaabasajja olw’obujjumbize mu nsonga 4.Katikkiro wa Buganda munnamateeka Charles Peter Mayiga asinzidde wano, ne yeebaza abantu ba Buganda olw’obujjumbize bwebalaze nga batumbula ebyobulamu, omuli n’abasajja okwettanira okwekebeza endwadde okuli mukenenya ne kokoolo w’akatungulu, obujjumbize mu kulabirira abaana, obujjumbize mu kulwanyisa obwavu, n’obujjumbize mu kusitula omutindo gw’amaka mu Buganda.
Katikkiro Charles Peter Mayiga asinzidde wano n’akubiriza abantu ba Buganda mu biseera by’akalulu akasembedde balonde abo be bawulira be baagala, era avumiridde ebikolwa bya poliisi n’amagye eby’okukuba abantu.Mu
Mu mbeera eno akalaatidde abantu emiggo n’omukka ogubalagala obutabalemesa kukuba kalulu.
Minisita wa Gavumenti ez’ebitundu era avunaanyizibwa ku nsonga za Buganda Ebweru Owek. Yozefu Kawuki, asomye alipoota engeri abantu ba Ssaabasajja gye baleese oluwalo mu mwaka guno 2025, era wano w’ategeerezza nti Oluwalo oluleeteddwa omwaka guno luwezezza ensimbi akawumbi kamu n’obukadde lusanvu n’okusoba.
“Ssebo Kamalabyonna bwe tugatta ebyo byonna, wetutuukidde olwaleero, nga akawumbi Kamu, mu obukadde lusanvu mu nkaaga mu Kamu, mu emitwalo ana mumusanvu mu enkumi ssatu ,mu lwenda mu nkaaga (1,761,473,960), nga zimaze okutuuka mu ggwanika lya Buganda, okuwaayo oluwalo lwa 2025 kukyagendera ddala mu maaso, okutuuka nga 24, ogw’okubiri l, Katikkiro lwanaggalirawo ddala kalenda y’omwaka guno, ate aggulewo ey’omwaka ogujja 2026.” Minisita Kawuki.
“Mukama wange wetutuukidde wano ng’eggombolola esinze okusituka ennyo mu Bwakabaka ye Ggombolola eya Mutuba 9 Kibinge mu Buddu, n’eddirirwa eya Mutuba gumu Bukuya Ssingo,ate nga amasaza ag’ebweru, essaza lya Bungereza lye lisinze okusituka.Omwami Hassan Mukiibi Sserunjogi, ye muntu ssekinnoomu asinze okuleeta oluwalo nga atodde obukadde 25, Essaza Kyaddondo lye likyakulembedde, ne liddirirwa Buddu, Busiro ate ne Ssingo, so nga Kabula yakyakoobedde, naddirirwa Buvuma awamu ne Buluuli.” Owek. Kawuki.
Omubaka omukyala owa disitulikiti ye Wakiso Betty Ethel Naluyima asiimye nnyo Obwakabaka olw’okugatta awamu abantu era n’okubaanirizanga buli lwe bajja embuga ne bawulira nti bali wakaAbaleese oluwalo olwaleero, kubaddeko abantu ba Ssaabasajja okuva mu masaza aga wano mu Buganda, ag’ebweru wa Buganda n’ebweru wa Uganda. Kuno kubaddeko Rwenzori, Ankole-Kigezi, Sweden ne Scandinavia, Southern California, Bungereza, Busiro, Kyaddondo, Kooki, Buluuli, Bulemeezi, ne Butambala.
Obukadde 163, n’ensimbi ezigwamu ze zireeteddwa olwa leero, nga eggombolola Ssaabawaali Gombe, y’ekize ku ggombolola zonna leero, eddiriddwa Mutuba IV Makulubita.Okuggalawo oluwalo kwetabiddwako, abantu ab’enjawulo okuli; Baminisita, Owek. Israel Kazibwe Kitooke, Abaami ba Kabaka Ab’amasaza; Kaggo Ahmed Matovu Magandaazi, Ssebwana Charles Kiberu Kisiriiza, Muteesa John Kankaka, Owek. Mutaasa Kafeero, Abaami ab’eggombolola, Bannabyabufuzi, Bannaddiini, n’abantu ba Kabaka abalala bangi.