Bya Gerald Mulindwa
Lugazi – Kyaggwe
Olusirika lw’Abataka Abakulu b’Obusolya n’Abakulembeze mu Bika luggaddwawo n’obubaka eri abataka okukyuka n’embeera y’Ensi basobole okuleetawo enkulaakulana mu bazzukulu baabwe.
Olusirika lutambulidde ku mulamwa, “Tunyweze Ebika byaffe tukuume Nnamulondo”
Ng’aggalawo olusirika luno, Minisita w’Obuwangwa n’Ennono, Oweek Anthony Wamala, asabye abeetabye mu lusirika luno baddeyo ku butaka batereeze obukulembeze kibayambe okutambulira awamu awatali kwerumaaluma. Era bakunge abazzukulu okusobola okubaagazisa ensonga z’Ebika. Annyikizza obukulu bw’okuyoyota obutaka bw’Ebika okusobola okusikiriza abazzukulu okwenyigira mu nsonga z’Ebika. Abakubirizza okutegeka eby’obugagga by’Ebika basobole okubiganyulwamu era basseewo enkiiko “Trustees” okusobola okunyweza eby’obugagga bino obutatwalibwa bannakigwanyizi.
Omukubiriza w’Olukiiko lw’Abataka Abakulu b’Obusolya, Omutaka Namwama Augustine Kizito Mutumba, asabye abataka okukkiriza okutereeza ebyo ebinokoddwayo, nga beeyambisa olugero “E Nswa bwekyusa amaaso nga naawe okyusa emvubo”, basseewo embeera y’okuwuliziganya okusobola okugenda mu maaso.
Abasomesa ab’enjawulo bawadde emisomo ku mitwe egy’enjawulo. Ssaalongo Kabanda Abby, asomesezza ku kuzimba n’okuteekateeka obukulembeze ku mitendera gyonna mu Bika, Dr. Batiibwe Moses asomesezza ku okukunga n’okwagazisa abavubuka ensonga z’Ebika mu Buganda, Omukungu Najib Nsubuga, omutaka Mawesano, n’abalala.
Olusirika luyindidde ku St. Mary’s College Lugazi, era abakiise balambuziddwa ebidiba bya eby’ennyanja ebisangibwa ku Mother Kevin Senior school eriddukanyizibwa Oweek Ssennyonjo Moses Kiyimba, omumyuka wa Ssekiboobo asooka.