Okwogera kwa Kabaka e Ssentema kigambo ku kigambo

Ba Minisita b’Obwakabaka, abakiise ba Palamenti, abakiise mu Lukiiko lwa Buganda, ow’e Ssaza Ssebwana, Ssentebe wa Buganda Land Board, Ssenkulu wa Guoji Group, bannadiini, L.C 5 owa Wakiso disituikiti ,abakulembeze b’ebitongole bya gavumenti eyawakati, abagenyi baffe mwenna, Bannabusiro mwenna. Okusooka nsanyuse nnyo okubalabako era mbeebaza n’ennyaniriza ennungi bwetyo. Twebaza ekitongole ky’Obwakabaka ekikola ku nsonga z’ettaka ekya Buganda Land Board olw’okutuukiriza ekirowoozo kyaffe eky’okuzimbira abantu ennyumba eziri ku mulembe nga zigya mu busobozi bwabwe. Twebaza ne bannaffe aba Guoji Group. Twebaza bannaffe aba Guoji Group betukolaganye nabo mu kuzimba amayumba gano, era tusaba ne bannamikago abalala okutwegattako mu nsonga eno. Tukubiriza abo bonna abanaagula enju zino okuzirabirira obulungi n’okutuukiriza obweyamo bw’okuzisasula ng’endagaano bwezinalambika. Okuba n’ennyumba ezisulwamu, era nga zitegekeddwa bulungi, eryo liba ddembe lya buli muntu. Liba ddembe lya buli muntu, era abakulembeze balina okukituukiriza. Tusanyukira nnyo Mwami Matia Lwanga Bwanika n’olukiiko lwa disitulikiti eye Wakiso, okulwanirira obutonde bw’ensi. Tubasaba n’olutalo lw’okuzimbira abantu baffe amayumba amalungi era agali mu busobozi bwa buli omu nakyo mukirowoozeeko. Twebaza Ssebwana n’olukiiko lwe, awamu n’owekitiibwa Kasesekende ne Buganda Land Board olw’omulimu omulungi bweguti gwebakoze. Tusiimye nnyo tusiimidde ddala. Nga mmaliriza, njagala okwebazaamu ak’ensusso amakula agavudde mu Bannabusiro. Amakula ago gabadde masuffu. Njagala okwebaza Sheikh Kasim Ssengonzi Supreme Khadi wa Wakiso disitulikiti olw’ebigambo ebirungi era ebikulu byayogedde olwaleero, weebale nnyo Sheikh. Nsanyuse nnyo okubeera wano olwaleero ku mukolo guno, n’okulaba ebyo byonna ebigenze mu maaso era bwetusuubira nti bijja kuyamba abantu baffe mu mbeera zabwe, mwebale nnyo mwebalire ddala. Era nziramu okwebaza abo bonna ababadde beenyigidde mu mulimu gw’okutandika omulimu guno era tusuubira bingi nnyo mu biseera eby’omu maaso. mwebale nnyo mwebalire ddala.

Share this: