Bya Miiro Shafik
Namaliiri – Kyaggwe
Obwakabaka bwa Buganda butongozza nnayikondo ku Kasawo Institute of Business and Technical Education esangibwa esangibwa e Namiliiri – Kasawo mu Kyaggwe.
Omumyuka Owookubiri owa Katikkiro Owek. Robert Waggwa Nsibirwa yatongozza okutandika okukozesa nnayikondo eno esimbiddwa Obwakabaka bwa Buganda nga bukolagana ne Wells of Life okuyita mu BUCADEF.
Owek. Nsibirwa agamba tazze kutongoza nnayikondo kyokka wabula n’okulaba embeera ettendekero mwe liri okulaba nti lyongera okukulaakunyizibwa lisitulwe omutindo. Ono yebazizza Bannamikago bonna abakwataganye n’Obwakabaka okuggusa omulimu gw’oluzzi luno.
“Tuli bakakafu nti nnayikondo eno egenda kusitula omutindo gw’ebyenjigiriza ng’abaana obudde bwe babadde bamala mu kukima amazzi babuzza mu kusoma ebitabo, tuli bakakafu nti n’omutindo mu byobulamu gugenda kusituka eri abayizi, abasomesa n’abatuuze nga bafuna amazzi amayonjo olwo n’omutindo gw’embeera z’abantu gusituke” Owek. Nsibirwa.
Owek. Nsibirwa agamba nti kati wagenda kuteekebwawo enkola eyamba okukuuma oluzzi luno nga lulungi Ku mbeera y’ettendekero, Owek. Nsibirwa agamba nti bw’alambudde ettendekero lino alabye omukisa gwa maanyi okulisitula likule, obuweereza obulimu busitule embeera z’abaana, abantu b’ekitundu kino ne Buganda okutwaliza awamu.
“Katikkiro yassaawo olukiiko okulaba nti waliwo ebiterezebwa mu kino, naddala okutema empenda eziraga ettaka ly’essomero lino we liyita okulaba nti lifuna ekyapa, nga tuwuliziganya bulungi bulungi n’olukiiko lw’eggombolola olwa LC.3” Owek. Nsibirwa.
Owek. Nsibirwa yebazizza Ssentebe w’eggombolola eno olw’okubeera omwerufu ku birina okukolebwa okulaba nti bava ku ttaka lino ekifo kikozesebwe essomero era amuwadde obweyamu nti buli nsonga ekwatibwa mu bwegendereza okulaba nti buli kimu kimalirizibwa mu kutegeeragana okulungi. Ono agamba nti baakolagana n’obukulembeze bw’eggombolola era bagenda kukwata ne ku nsonga z’abantu abali ku ttaka essomero lino kwe lirina okugaziyira, okulaba nti ensonga zonna zimulungulwa.
“Obwakabaka bwa Buganda bugenda kukola enteekateeka okusitula omutindo gw’ettendekero lino, era mu mbalirira y’Obwakabaka omwaka ogujja, Kasawo Institute of Business and Technical Education egenda kuteekebwamu okulaba nti mu mwaka gw’ebyesimbi ogwo 2026/2027 waliwo enkulaakulana eteekebwawo” Owek. Nsibirwa.
Ono akubirizza abaana abali mu ssomero okumanya nti okusoomooza okuli mu ggwanga lino eri abavubuka ssi bbula lya mirimu, wabula endowooza y’abantu ku mirimu, agamba nti abavubuka bangi baagala kutuula mu zi woofiisi balinde omusaala kyokka nga ssente entuufu ziri mu kwetandikirawo mirimu, omuntu afune ssente ez’olutetenzi.
“Njagala mutwale eky’okusoma eby’emikono ssi nga kikubagizo wabula omukisa okwesitula n’okufuna obukugu obwetaagisa mu kutandikawo emirimu” Owek. Waggwa.
Minisita w’Enkulaakulana y’abantu ne woofiisi ya Nnaabagereka akuutidde abantu okufaayo ennyo ku nsonga y’okukolagana obulungi na buli muntu, ono agamba nti Minisitule ez’enjawulo okukwatagana ne zifuna bannamukago n’abakulembeze ab’enjawulo ekkula lino ery’amazzi amayonjo ku ttendekero lino lituukibwako, agamba kino kigenda kwongera omutindo gw’ebyensoma mu kitundu kino ng’abaana tebasumbukana kufuna byetaago.
Owek. Hajj Amisi Kakomo, Minisita w’Obulimi, Obulunzi, Obusuubuzi n’Obweggasi asanyukidde ekkula erituukiddwako okuteekawo oluzzi luno, okuva ku kiteeso ekyayisibwa mu kabineeti okutuuka ku kunonya bannamukago n’okukwatagana n’ebitongole eby’enjawulo okulaba nti buli kimu kiwedde bulungi era akati amazzi gasobola okukozesebwa obulungi. Ono akubirizza ab’essomero okulabirira obulungi nnayikondo eno ereme kwonooneka.
Ssekiboobo Owek. Vincent Matovu Bintubizibu, yebazizza ekirowoozo ky’okuteeka oluzzi ku ssomero lino ky’agambye nti kitaasizza abaana akatyabaga k’obubenje. Ono yebazizza ssenkulu w’ettendekero olw’obukulembeze bwe, era amusabye okukwatagana n’amasomero ga siniya agalinayewo, kibayambe okwongera ku bungi bw’abaana, ettendekero lya Beene lyongere okubangula b’eggwanga.
Owek. Matovu asuubizza obuwagizi okuva mu woofiisi ye eri essomero lino okukulaakulana. Ono era akubirizza abayizi okuteekayo omwoyo ku bye basoma ng’akikaatiriza nti eby’emikono bye balimu bye biriko ensangi zino, byanguyiza abantu okwefunira emirimu n’okugyetandikirawo. Bwatyo abakubirizza okukozesa omukisa gwe balina obulungi bafunemu ddala.
Robert Baluku ku lwa Wells of Life agamba nti bwe bajja okulaba embeera y’amazzi mu kitundu banyolwa nnyo okulaba nti abaana amazzi bagafuna busukka ekkubo ate nga waliwo akatemerero kawanvu. Ono alaze okusiima eri Obwakabaka olw’omukago gwe balina oguyambye mu kutuusa empeereza ez’amazzi amayonjo mu bitundu ebyenjawulo. Akubirizza abagenda okukozesa oluzzi luno okufuba okulukozesa n’okululabirira obulungi lusobole okuwangaala ekiseera luganyule essomero n’abatuuze.
Ku lwa Ssentebe wa bboodi y’essomero lino, Omuky. Margaret Ssempala yebazizza Gavumenti ya Kabaka, n’obukulembeze bw’essaza Kyaggwe olw’enteekateeka ezikolebwa mu kusitula ettendekero lino Ono yebazizza amazzi ge bafunye okulaba nti abaana bagenda kutaasibwa ku kutambula olugendo okufuna amazzi.
Ssentebe w’eggombolola eno Ssentongo Rajab Mukasa, asabye bayambibweko okulaba nti bafuna ekifo ekirala we bateeka woofiisi endala ez’eggombolola basobole okuva mu bizimbe ebiri mu kifo ky’essomero bakyuse we bakakkalabiriza emirimu. Ono akubirizza abayizi naddala abawala okusoma basobole okufuna ebirungi mu maaso.
Omulimu gw’okusima nnayikondo eno gukuembeddwamu Obwakabaka bwa Buganda nga bukozesa ssente ezava mu ssaza Northern California (San Francisco ne Nevada) erikulemberwa Owek. Patrick Nalika Ssendegeya, amyukibwa Paul Kiruuta nga bano bayita mu kibiina ‘Buganda Amakula’. Enteekateeka eno erimu ne bannamikago b’Obwakabaka aba Wells of Life.