Okutumbula ennono mu baana; Mituba 2 Nabweru etagese empaka Bya
Bya Saava Kevins Kanyike
Kampala-Kyaddondo
Eggombolola Mituba II Nabweru mu Kyaddondo etegeze empaka z’obuwangwa n’ennono mu baana abato abali ku mutendera gwa pulayimale era nga zino zitegekedwa ku Bat Vallery Theatre mu Kampala.
Empaka zino ezituumidwa ‘Tourism Prince and Princess Primary Schools pageant’ zetabiddwamu amasomero ag’enjawulo okuva mu ggombolola eyo era omulamwa omukulu gubadde ku kutaasa butondebwensi nga bakuuma ennono so n’aboolesi batambulidde ku mulamwa gwe gumu mu bye boolesezza.
Minisita w’Obuwangwa n’Ennono mu Buganda Owek. Anthony Wamala ab’e Nabweru abasabye essira okuliteeka ku bibetoolodde okubikozesa obulungi basobole okubigyamu omugaso naddala okukuuma obutonde obuyenjebuse ennyo ennaku zino olw’enkwata gye bukwattiddwamu. Agamba nti kino bwekitandikira mu baana abato bajja kumanya nti pulasitika asobola okukolwamu ebintu ebirala kuba Obwakabaka bwayanjula enkola y’akacupa nazo ssente n’enteekateeka endala ez’okutaasa obutondebwensi.
“Twagala abaana okuva mu kusoma obusomi mu wabula baggule obwongo okubeera abayiiya nga bagya mu pulasitika ebintu erirala ebiyinza okubayimirizaawo” Oweek Wamala bwanyonyodde.
Minisita Wamala ajjukiza abaana nti teri asobola kulya birungi bya nsi okugyako abo abavumu kyokka n’asaba abazadde okutendeka abaana obuvumu nga basobola okweyogerera naddala ku bisomoozo bye bafuna mu bulamu.
Omumyuka asooka owa Kaggo Bakulumpagi Ronald asiimye nnyo abateesiteesi b’empaka zino olw’okugumizza olulimi Oluganda mu baana nga babakugira okutatabiikiriza nnimi ndala nga balwogera ekintu ekirabikira ennyo mu baana ku mulembe guno.
Omwami w’eggombolola Mituba II Nabweru, Omumbejja Mariam Ndagire alaze nti ekivvulu ky’abaana kino kyagendereddwamu okuzza ennono nga basinzira mu baana nti olwo, omulembe gw’enkya bwe gunaasobola okutaasa n’okukuuma Obuwangwa bwabwe. Ono era alaze nti empaka z’ebyobulambuzi mu baana ziruubirira okubaawo buli mwaka.
Empaka zino ziwanguddwa Mayanja Shaban okuva ku Vintage House Infant and Primary School Kawanda addiridwa Kabazzi Daphine Mary okuva ku St Lawrence Primary School Kagoma.