Bya Pauline Nanyonjo
Mmengo-Kyaddondo
Omukolo gw’okukuza olunaku lw’Abakyala mu Buganda gwa kubeera Buwama Mawokota.
Enkya 12 Mugulansigo Obwakabaka bwa Buganda lwe bugenda okukulizaako olunaku lw’Abakyala era entikko y’omukolo ya kubeera Buwama mu Mawokota. Maama Nnaabagereka Sylvia Nagginda y’asuubirwa okuba omugenyi omukulu.
Mu kusooka, Nnaabagereka ajja kulambula emirimu gy’Amaka amalungi akaalo amatendo ew’Omukyala Nantume Josephine n’Omwami Vincent Ssemanda mu muluka Mbizzinnya. Oluvannyuma Nnaabagereka ajja kwolekera ekyalo Katikanyonyi okulambula amaka ga Namwandu Zainabu Nakijoba Ssabiiti, omulunzi w’enkoko, akola eddagala ly’obutonde, mulimi, akozesa bulungi amazzi okubuna olusuku n’ebisolo. Nga avudde mu kulambula ebifo bino.
Nnaabagereka wa kwolekera Buwama ku kisaawe ky’Essaza ku mbuga y’e Ggombolola Musaale Buwama ewategekeddwa entikko y’omukolo gw’Abakyala era wano abakyala okuva mu Masaza ga Buganda gonna webanaakungaanira okukuza olunaku lw’abwe.
Enteekateeka eno efulumiziddwa Minisita wa bulungibwansi, obutondebwensi n’Ekikula ky’Abantu, Oweek Hajjat Mariam Nkalubo Mayanja mu lukungaana lwa bannamawulire lwatuuzizza ku Bulange enkya ya leero. Omukolo gwa kutambulira ku mulamwa;
“okusobozesa Abakyaka okukulemberamu enkyuukakyuka mu by’obusuubuzi, eby’obulamu n’ebyobutonde bw’ensi”.Oweekitiibwa Mariam annyonnyodde nti omulamwa ogwalondeddwa guluubirira okuteekawo enkyuukakyuka naddala mu mirimu egikolebwa abakyala mu Buganda “Twalaba nga ebintu ebyo okuli obusuubuzi, eby’obulamu n’obutonde bwebissibwako essira bisobola okuleeta enkyuukakyuka mu nkulaakulana y’Abakyala olw’ensonga nti byonna bitambulira ku mirimu gye bakola”. minisita Mariam Mayanja bw’alambuludde.
Minisita Mariam akunze abantu ba Kabaka okuva mu buli kanyomero k’Ensi bajje beetabye ku mukolo gw’Abakyala balabe ebintu eby’enjawulo bannakazadde b’eggwanga bye bakola.