Bya Francis Ndugwa
Katikkiro Charles Peter Mayiga atabukidde Sipiika Annet Anita Among ne banne abayingizza Abaganda mu nsonga z’okuggyawo ekitongole ki Uganda Coffee Development Authority (UCDA) neyeewuunya lwaki okuzza ekitongole kino mu Minisitule bakirabye ng’obuwanguzi ku Buganda.
Obubaka buno Kamalabyonna Mayiga abufulumizza ku Lwokutaano bw’abadde ayanukula eddoboozi lya Sipiika Among mweyawulikikidde ng’akunga ababaka balemese ekiteeso kino.
” Okuggyawo UCDA, kibonerezo eri Abaganda abavaamu kumpi ebitundu 50% eby’emmwanyi ezitundibwa okuva mu Buganda, olw’okuba Sipiika Anita Among (n’abo abawagira okuggyawo UCDA) kino bakiraba ng’obuwanguzi ku baganda!” Katikkiro Mayiga bw’ategeezezza
Owek. Mayiga agamba nti Obwakabaka bwa Buganda bulabudde enfunda eziwera ku kuggyawo UCDA, olw’omulimu ekitongole gwe kikola mu kutumbula n’okulondoola omutindo gw’emmwanyi ekiyambye abantu okuziganyulwamu.
Kino kiddiridde Sipiika Among okuwulikika ng’akunga abamu ku babaka ba Palamenti okulemesa ababaka abava mu Buganda okuyisaamu enteekateeka yabwe ey’okulemesa ekiteeso kino era kino bangi baakitapuse nga okuba n’enge ku Baganda.
Kamalabyonna Mayiga agattako nti amaka agasukka mu bukadde 2 gayimiriddewo ku mmwanyi nga bwekityo kibeera kikyamu okuggyawo ekitongole kino ekyamala edda okulaga obukugu n’okuyamba okubbulula ekirime kino.
Mukuumaddamula asinzidde wano nakunga abantu okugenda mu maaso n’okulima emmwaanyi mu nteekateeka ya Emmwaanyi Terimba kubanga okutumbula embeera zaabwe ez’ebyobulamu kikulu nnyo okusinga ebigendererwa bya bannabyabufuzi.
Bino webijjidde nga Kamalabyonna Mayiga abadde alambula ebitundu ebyenjawulo mu Buganda nga akunga abantu okulima emmwaanyi n’okuzigattako omutindo basobole okutumbula embeera zaabwe wansi w’enteekateeka y’Emmwaanyi Terimba.