Bya Shafic Miiro
Nakitokolo – Busiro
Obwakabaka bwa Buganda bukungubagidde abadde omuweereza ku BBS Terefayina, Eng. Ahmed Ssenabulya afiiridde mu kabenje e Nabbingo ku makya ga leero oluvannyuma lw’okutomera emmotoka kika kya Fuso nga bw’abadde ku PikiPiki ye nga agenda okukola.
Obubaka obukungubaga buweereddwa Katikkiro Charles Peter Mayiga nga abutisse Minisita Minisita w’Amawulire Okukunga era Omwogezi w’Obwakabaka, Owek. Israel Kazibwe Kitooke.
Owek. Mayiga atendereza emirimu omugenzi gyakoze mu kiseera Katonda kyamuwangaazizza ku nsi. Ssenabulya ayogeddwako ng’omuntu abadde omwetowaze era omukakkamu ddala.
Obwakabaka busaasidde abantu b’omugenzi bonna olw’okuvibwako omuntu ono, abadde n’obukugu obwenjawulo.
Ku lulwe, Owek. Kazibwe asabye gavumenti okukola enguudo n’okufaayo ku bulamu bw’abantu beekulembera, ayongeddeko nti enguudo nnyingi zijjudde binnya ebiviiriddeko obubenje bungi obututte obulamu bw’abantu bangi.
Ye Ssenkulu wa BBS Terefayina, Omuk. Patrick Ssembajjo ategeezezza nti ekitongole n’eggwanga bisubiddwa Omuntu ow’amaanyi ennyo naddala olw’emirimu gy’akoze ku mikutu gy’Amawulire egy’enjawulo mu ggwanga muno n’ebweru waalyo.
Atendereza nnyo omugenzi empisa z’abadde nazo n’enkolagana gy’abadde ne bakozi banne, ku lw’ekitongole kyonna asaasidde Nnamwandu abaana n’abooluganda lw’omugenzi n’asaba Mukama abagumye mu kaseera kano.
Omugenzi agalamiziddwa ku biggya bya bajjajjaabe e Nsangi Nabitokolo, awerekeddwako banne baabadde akolagana nabo ku Terefayina, aba leediyo CBS, ab’emikutu gy’Amawulire egy’enjawulo, Abaami ba Kabaka ab’enjawulo, bannabyabufuzi n’abantu abalala abawerako.
Wummula Mirembe Eng. Ssenabulya.