Bya Ronald Mukasa
Bulange – Mmengo
Enteekateeka eno efulumiziddwa Ssentebe w’olukiiko oluteesiteesi era Minisita wa Gavumenti ez’Ebitundu, Okulambula kwa Kabaka n’ensonga za Buganda ebweru, Oweek Joseph Kawuki, mu lukungaana lwa bannamawulire olutudde enkya ya leero.
1. Amazaalibwa g’Omutanda ag’emyaka 69 gagenda kukuzibwa ng’ennaku z’omwezi 13 Kafuumuulampawu 2024
2. Emikolo emikulu egy’okusabira Omutanda gya kubeera mu Kkanisa y’Abadiventi e Najjanankumbi
3. Waliwo enteekateeka mu Masaza gonna okwetoloola Buganda ey’okusoosowaza n’okumanyisa Obuganda ebikwata ku bulamu bwa Ssaabasajja okuva mu butoobwe, byayiseemu n’engeri gyakulembeddemu Obuganda kati emyaka kumpi 31. Enteekateeka eno egenda kubeera ku “byoto – essomero ly’Omuganda ery’ennono.” Abavubuka be bakutte omumuli nga balungamizibwa abaami ba Kabaka mu masaza n’amagombolola era ekyoto ekikulu kya kubeera ku ttendekero ly’Obwakabaka erya Buganda Royal Institute of Business and Technical Education e Kakeeka Mmengo. Enteekateeka eno mu masaza gonna ya kubaawo nga 12/04/2024.
4. Wajja kubaawo olutambi olw’enjawulo olunaalaga obulamu bwa Ssaabasajja Kabaka, byazze ayitamu ne byakoze okuva obuto.
5. Waliwo enteekateeka y’okugaba obujjanjabi ku Kkanisa nga 13/04/2024, omuli okukebera endwadde nga siriimu, okujjanjaba amaaso, n’okusomesa abantu ba Kabaka ku ndwadde ez’enjawulo.
6. Abagenyi ab’enjawulo abatonotono bebayitiddwa okwetaba mu kusaba okwo.
7. Eby’okwerinda, bijja kuba gguluggulu era nga bikulembeddwamu KPU ng’ekolagana n’ebitongole bya gavumenti ebirala ebikola ku kukuuma eddembe.
Obwakabaka bukubiriza abantu ba Ssaabasajja yonna gyebali okujjumbira enteekateeka ezikoleddwa okwogera ku bulamu n’emirimu gya Ssaabasajja mu myaka 69 wamu n’okusimba emiti egy’ekijjukizo.
Ensisinkano eno yetabiddwamu Minisita w’Amawulire Okukunga era Omwogezi w’Obwakabaka Oweek Israel Kazibwe Kitooke, Minisita avunaanyizibwa ku by’obulamu n’enkulaakulana y’Abantu, Oweek Choltilda Nakate Kikomeko, Omwami w’Essaza Kyaddondo Kaggo Hajji Mohamood Magandaazi Matovu, Omwami w’Essaza Bulemeezi Kangaawo Ronald Mulondo.