Bya Samuel Stuart Jjingo
Mmengo – Kyaddondo.
Katikkiro Charles Peter Mayiga atongozza obukulembeze bwa Nkobazambogo obuggya ne ssemateeka w’ekibiina omuggya ng’asinziira mu Bulange e Mmengo.
Katikkiro Mayiga akubirizza abavubuka okunyweza ekkalaamu ng’akikaatiriza nti omuntu omuyigirize abaako n’entandikwa mu bulamu okukira kw’oyo atasomye era bwatyo abasabye okufaayo ennyo okumaliriza emisomo gyabwe.
“Ebyenjigiriza bwe bununuzi bw’omuntu yenna era mu nsi yonna abantu abakoze ebyannagwano bonna bayigirize,” Katikkiro Mayiga.
Owoomumbuga yebazizza abakulembeze abawummudde olw’obuweereza bwe bakoze era n’asibirira ab’olukiiko oluggya okutambulira ku nnyingo ez’omulembe omuggya (obuyiiya, obwerufu, obunyiikivu n’okukola n’okwagala) n’okukolera awamu mu buvunanyizibwa obuboolekedde.
Katikkiro asinzidde wano n’alabula abavubuka obutagwa mu butego bw’obwamaaya obukyase ensangi zino mu Uganda n’ebweru waayo. Alaze obwenyamivu olw’abaana ab’obuwala abali mu nsi ya Buwalabu abatwaalibwayo okukola omulimu gw’okwetunda nga ne mu ggwanga kyeyongeredde ddala kyagamba nti kizze olw’okubera nti abavubuka bangi nnyo banaffu era basoonokerera mu mirimu ekituusizza n’abasajja okwetunda mu bakazi abalina kye beekoledde.
Ye Minisita w’Abavubuka Owek. Robert Serwanga ayanjulidde Katikkiro obukulembeze bwa Nkobazambogo obw’okuntikko mu ggwanga lyonna oluggya nga bukulemberwa Ssemujju Moses Mwanje okuva ku ssetendekero ya Makerere nga ono asikidde Ssentebe Adrian Lubyayi naye asomera ku Makerere University. Minisita asabye abakulembeze abalondeddwa obuteebulankanya wabula bafube okutuukiriza obuvunanyizibwa obubaweereddwa.
Omukiise wa Nkobazambogo mu Lukiiko lwa Buganda Olukulu Owek. Harriet Namukasa akuutidde abavubuka okubeera obumu kubanga Nkobazambogo ggye lya Kabaka ezibizi era Obwakabaka bubalinamu obwesige bungi nnyo.
Ssentebe w’Abavubuka mu Buganda munnamateeka Derrick Kavuma ayogedde ku nsonga y’ebiragalalagala ekyase ebiseera bino nga esingidde ddala kulabikira nnyo mu bavubuka, bwatyo n’abasaba okubyewala n’okwongera okusomesa abalala obulabe obubirimu olwo bisobole okwewalibwa, Eggwanga lufune abatuuuze abalungi.
Abadde Ssentebe wa Nkobazambogo mu Uganda yonna Adrian Lubyayi agamba nti tewali muntu agenda kubaggya ku Ssaabasajja Kabaka newankubadde bannyomebwa, era asabye bavubuka banne obutaganya muntu yenna kubabuzaabuza naddala ebigambo ebiyisibwa ku mitimbagano. Ono ng’asoma alipoota ye, alaze nti basobodde okukunga Bannankobazambogo okujjumbira enteekateeka z’Obwakabaka n’okuzimanya, era Bannankobazambogo naddala abali mu bitundu ebiri Ebweru wa Buganda bongedde okwetaba mu mirimu gy’abavubuka.
Ssemujju Moses Mwanje ye Ssentebe wa Nkobazambogo omuggya, Amyukibwa Nakimuli Jovia, Mutaasa Micheal ye mukubiriza w’Olukiiko luno ate Ndagire Christine ye muwandiisi waalwo.
Omukolo guno gwetabiddwako Minisita w’Amawulire Owek. Israel Kazibwe Kitooke, abakiise b’abavubuka mu Lukiiko lwa Buganda Olukulu; Owek. Dr. Rashid Lukwago, Owek. Ann Kigudde, abakulembeze b’abavubuka mu biti eby’enjawulo.