Namanve
Pulezidenti Yoweri Kaguta Museveni alagidde Col. Edith Nakalema ayingire mu nsonga z’abantu abeesenza ku ttaka ly’ekibira ky’e Namanve ekimanyiddwa nga’ Namanve Central Reserve’ wamu ne ‘Zirimiti Central Reserve.’
Kino kiddiridde abantu abasoba mu bisatu (300) okuzingako ettaka lino nga bakutte ebissi n’amajambiya ne batandika okulyegabanya n’okulisalamu poloti.
Nakalema nga y’akulira akakiiko akalwanyisa obulyi bw’enguzi mu maka g’obwapulezidenti, olwaleero akedde kulambula kibira kino era n’awera okutuuka ku kinyusi ky’ensonga eno.
“Twagala okumanya abantu abali emabega w’okutwala ettaka lino n’abantu abeesenza ku ttaka lino nebatuuka n’okulifunako ebyapa. Twagala era okumanya baabifuna batya era ani yabibawa, ekitongole kya NFA kikozeewo ki ku nsonga eno.” Nakalema bw’agambye.
Ekibira kino kyonna kiwerako ‘Hectares’ 2000 era nga kyafuulibwa ekibira kya gavumenti mu 1932 naye okusinziira ku bakulu mu kitongole kya National Forest Authority (NFA), bagamba nti yiika 20 abantu baamaze dda okuzesenzaako.
Mu kaweefube w’okugezaako okutaasa ettaka lino, ekitongole ky’ebibira kyali kyawaayo ettaka lino eri abalimi b’emiti balimireko kalittunsi wabula kino tekyalemesa bantu bamu kuzimbako nnyumba.
Aduumira poliisi e Mukono, Abubakar Musiho, annyonnyodde Nakalema nti waliwo abantu abawerako bonna bakaayanira obwannanyini ku ttaka lino okuli; ekitongole ky NFA, amakampuni ate n’abantu ssekinnoomu abagamba nti baalifuna kuva ku Bwakabaka bwa Buganda ng’ekirabo.
Akulira ekitongole kya NFA, Tom Obongo Okello, omusango agutadde ku kakiiko k’ebyettaka (Uganda Land Commission) n’ategeeza nti ettaka erimu ku kitundu kino lyaweebwa bannamakolero mu 1997 ate eddala nelisigalawo nga lya kibira.
Obongo agasseeko nti ekibira kyokka ekisigaddewo ky’ekyo ekiri ku ludda lw’essomero lya Namiryango College naye ate nalyo waliwo abalirinako ebyapa.
Bya URN