Bya Francis Ndugwa
Bulange – Mmengo
Minisita avunaanyizibwa ku by’obulamu n’embeera z’abantu mu Bwakabaka Owek. Dr. Prosperous Nankindu Kavuma asabye abazadde okukozesa omukisa gw’okugema COVID-19 okw’ekikungo okutegekeddwa mu Bulange e Mmengo okuleeta abaana abali mu luwummula nabo bagemebwe.
Okusaba kuno Minisita Nankindu akukoze aggalawo olunaku olusoose olw’okugema kw’ ekikungo okw’omulundi ogw’okubiri okwategekeddwa mu Bulange e Mmengo nga kutandise leero ku Lwokusatu.
“Tukubiriza abazadde okujjukiza abaana abali mu luwummula n’abalala abatanawummula bajje wano kuba bafunye omukisa okugemebwa ekirwadde kya COVID-19 mu luwummula luno. Tubeebaza kuba omuwendo gutuuse ku gwetwabadde tusuubira okufuna,” Minisita Nankindu bw’alambuludde.
Ono asabye abantu abawezezza emyaka 50 n’okudda waggulu nga baagemwa okufuna akayiso kuba bakeetaaga wadde nga abamu balowooza nti emibiri gyabwe gyaguma era gisobole okwerinda ekirwadde kino.
Owek. Nankindu asabye abo bonna abalabye ebisoomoozo okubatuukirira okusobola okulambika enteekateeka eno, abantu ba Beene basobole okuganyulwa, neyeebaza abasawo n’ebitongole ebiwagidde enteekateeka eno.
Okugema kuno kusoobye abantu bangi omubadde ne Ssaabawolereza wa Buganda, Owek. Christopher Bwanika asabye abantu okukomya okusaagira mu nsonga z’ebyobulamu naye baveeyo beegemese ekirwadde kino kuba kikyaliwo.
Ye akulira eby’obulamu mu ggombolola ye Lubaga, Dr. Dennis Buluma akunze banna Uganda okwettanira okugembwa kuno naddala mu budde buno nga abangi balowooza nti ekirwadde kyaweddemu amaanyi.
Okugema kuno kugenda kumala ennaku 4 era kusuubirwa okukomekerezebwa nga 23 omwezi guno. Enteekateeka eno ewagiddwa Majestic Brands, Red Cross, amalwaliro agenjawulo, UNAIDS, CBS FM ne BBS Terefayina, KCCA n’abalala.