Bya Ronald Mukasa
Bulange – Mmengo
Minisita wa Kkabineeti, Olukiiko n’Ensonga za Woofiisi ya Katikkiro, Owek. Noah Kiyimba alaze okutya olw’obusiiwufu bw’empisa obweyongera buli lukya ekigenda okuteeka ebiseera by’eggwanga eby’omu maaso mu matigga.
Okwogera bino Owek. Noah Kiyimba abadde atikkula Oluwalo kulwa Katikkiro Charles Peter okuva mu Bannakyaggwe ne Bannabusujju ku Lwokubiri.
Owek. Kiyimba asinzidde wano naasaba abazadde okufuba okuzza empisa mu baana babwe basobole okubeera ab’omugaso mu maaso.
Mu ngeri yeemu Minisita Kiyimba akubirizza Abaganda okumanya obukulu bw’Ebika era babyenyumirizeemu kubanga eno yeemu ku mpagi ezirina okuzza Buganda ku ntikko.
Ono asabye abakulembeze mu Bwakabaka ku mitendera egy’enjawulo okufaayo okutuukiriza obuvunaanyizibwa bwabwe kiyambe abantu ba Beene okufuna empeereza eggwanidde.
Minisita Kiyimba yeebazizza nnyo Bannakyaggwe ne Bannakyaddondo olw’okukiika embuga n’oluwalo lwa bukadde 28,480,000 era nabakubiriza bulijjo obutalekaayo baana bato.
Ate ye minisita wa Gavumenti ez’Ebitundu mu Bwakabaka, Owek. Joseph Kawuki , akunze abakulembeze ku mitendera egyenjawulo, okubeera abasaale mu kuzza Buganda ku ntikko nga buli omu ateeka easira ku kitundu kye.
Owek. Kawuki era abakuutidde okubanguka ku nsonga Ssemasonga ettaano eza Buganda era bafeeyo okuzimanyisa n’abantu be bakulembera.
Ye Minisita w’Abavubuka, Emizannyo n’Ebitone, Owek. Robert Sserwanga asabye abantu bulijjo okuwagira enteekateeka za Buganda kubanga zigendereddemu kubasitula.
Abakiise embuga kuliko eggombolola ya Mumyuka Nakawa okuva mu ssaza Kyaddondo, Mutuba 9 Goma okuva e Kyaggwe ne Ssaabagabo Ngogwe okuva e Kyaggwe.
Omukolo guno gwetabiddwako Minisita w’Amawulire n’Okukunga abantu ba Kabaka, Owek. Israel Kazibwe Kitooke, Owek. Robert Sserwanga bannabyabufuzi n’abakungu abalala.