Bya Musasi Waffe
Kampala
Minisita w’obutebenkevu (Security) mu ggwanga, Maj. Gen.Jim Muhwezi ategeezezza nti ebimuvunaanwa ab’oludda oluvuganya nti yalagajjalira omulimu gwe abantu b’akulembera ne balinnyirira eddembe lya bannansi si bituufu kuba naye talina ky’amanyi.
Muhwezi ategeezezza nti ye ng’omuntu tawagira bikolwa ebyokutulugunya bannansi, kale ng’okumulumiriza n’okwagala okumuggyamu obwegise kubeera kumulanga bwemage.
Kino kiddiridde akulira oludda oluvuganya gavumenti mu Palamenti, Mathias Mpuuga Nsamba okutandika ku nteekateeka y’okukung’aanya emikono okuggyamu Minisita Muhwezi obwesige olw’okutunula obutunuzi ng’eddembe lya bannansi lityoboolwa.
Eggulo ku Lwokubiri, Owek. Mpuuga yafulumizza olukalala olwalaze ng’ababaka abawera 81 bwe baamaze edda okuteeka emikono ku kiwandiiko kino wadde ng’etteeka liragira omuwendo gw’ababaka ogwessalira okubeera 176 okusobola okutuukiriza kino era abavuganya balina essuubi nti nsalessale w’anaatuukira ng’emikono giweze.
Minisita Muhwezi agamba nti bwekiba kyakunoonya muntu mutuufu alina okugyibwamu obwesige alina kubeera minisita mulala oba ow’ebyokwerinda oba ensonga z’omunda mu ggwanga kuba bano be bakwatibwako ensonga zino obutereevu.
Ono era annyonyodde nti akimanyi bulungi nga gavumenti mwakolera bwe tawagira bikolwa byakutulugunya bantu era kino kyeraze lwattu ng’Omukulembeze w’eggwanga Yoweri Museveni avaayo entakera n’alabula ab’ebyokwerinda okukomya okutulugunya abantu era n’akakasa nti oyo yenna anaakwatibwa mu kikolwa kino ajja kuvunaanibwa.
Kinajjukirwa nti abawagizi b’oludda oluvuganya gavumenti bazze balumiriza ebitongole ebikuuma ddembe okuwamba abawagizi baabwe ne babasibira mu bifo ebitamanyiddwa mu mateeka ne batulugunyizibwa, ne batuuka okuyimbula nga bonna bajjudde ebisago n’enkovu, n’abandi okusibwa ne batatwalibwa mu kkooti kwewozaako.
Abakyasembyeyo ye muwandiisi w’ebitabo Rukirabashaija Kakwenza n’omukwaganya w’ekibiina kya NUP e Kasese, Samuel Masereka abaatulugunyizibwa ebitagambika.