Bya Ssemakula John
Kampala – Kyaddondo
Minisita w’ebyamawulire n’okulung’amya eggwanga, Dr.Chris Baryomunsi atabukidde omwogezi wa poliisi mu ggwanga Fred Enanga, ku ngeri gy’akolamu emirimu gye gyagamba nti telaga buvunaanyizibwa.
Kino kiddiridde Enanga okutegeeza nga bwebagenda okuyita abantu abawerako omuli ne Minisita Baryomunsi bannyonnyole ku bitambuzibwa nti eyabadde Sipiika Jacob Oulanyah yafa butwa.
Bweyabadde ayogerako eri bannamawulire ku Mmande omwogezi wa poliisi Fred Enanga, yategeezezza nti Ssentebe wa NRM mu Buganda, Godfrey Kiwanda, Minisita Baryomunsi, Pulezidenti wa NUP, Robert Kyagulanyi, taata w’omugenzi Nathan Okori, Omubaka Gilbert Oulanyah awamu n’abalala balina okweyanjula boogere kyebamanyi.
Bw’abadde mu lukungaana lwa bannamawulire leero ku ssengejjero ly’amawulire ga gavumenti mu Kampala, Minisita Baryomunsi agamba nti kikyamu Enanga okulaga nga bwagenda okuyita taata wa Jacob Oulanyah, Nathan Okori mukiseera kino nga akyakungubagira omwana we nga engeri Enanga gyakolamu ebintu bye yacamuka nabuteebuuza.
“Kikyamu okuyita taata w’omugenzi eyakafiirwa. Watuuse Enanga ajja kuyita n’omugenzi Jacob Oulanyah okweyanjula gyali. Alina okukomya okucamuka n’okunnyingiza mu nsonga ze,” Minisita Baryomunsi bw’ategeezezza.
Okusinziira ku Baryomunsi kikyamu Enanga okuyingiza erinnya lye mu by’obutwa bwa Oulanyah nga akimanyi bulungi nti Baryomunsi tayimirirangako wantu wonna nagamba nti enfa ya Oulanyah erimu obutwa.
Wabula ku Mmande Enanga yagambye nti bagenda kuyita Baryomunsi kuba Kiwanda amujuliza nti oluvannyuma lwa Oulanyah okumugamba nga bweyaweebwa obutwa nga yakafuuka Sipiika yamubuulirako namubuuza kyebalina okukola.
Ate ye Kiwanda ku Lwomukaaga yannyonnyodde nti wadde omufu yamugamba obutabaako gwakibuulira naye yabuulirako Baryomunsi nga ayagala basale amagezi.
Enanga yatangaazizza nti buli aliko kyeyayogera nti Oulanyah yaweebwa obutwa alina okwekeneenyezebwa era abagatambuza nalaga n’obukakafu bw’alina ku nsonga eno kuba alipoota y’abasawo yalaga nti omugenzi yafa lwa bitundu bye eby’omubiri okulemererwa.