Bya Gerald Mulindwa
Ngondati – Buddu
Ssaabasajja Kabaka atenderezza obuweereza bwa musajja we kati omugenzi Oweek Tofiri Kivumbi Malokweza obubaddemu ebitone ebingi ebisuubirwa mu bakulembeze.
Obubaka bwa Kabaka busomeddwa Katikkiro Charles Peter Mayiga mu kuziika omugenzi ono e Ngondati Lwengo mu Buddu. Omutanda ayogedde bwati ku mugenzi Tofiri Kivumbi Malokweza.
“Twafunye amawulire ag’okufa kwa mukwano gwaffe eyali Owessaza Kaggo Tofiri Kivumbi Malokweza. Kitalo nnyo.Obwakabaka bufiiriddwa ow’essaza eyali ow’amaanyi, tusaasira nnyo Namwandu, ba mulekwa, abooluganda n’abemikwano olw’okufiirwa mukadde wammwe.
Mu ngeri y’emu tukubagiza omutaka kisoro olw’okuviibwako empagi luwaga mu Kika. Mu ngeri ey’enjawulo tusaasira ekelezia katulika olw’okufa kw’omukirisito abadde omugundiivu eyali omusirkale wa Paapa. Twegatta n’abantu baffe bonna okukungubagira omuntu eyakola emirimu egy’etttendo mu Ssaza lyaffe ery’e Kyaddondo.
Tujjukira bulungi obuweereza bw’omugenzi obubaddemu ebitone ebingi ebisuubirwa mu bakulembeze nga mwe muli obwetowaze, obukozi n’obuwulize eri Namulondo. Yakola omusingi omulungi abaami ba Kabaka kwebatambuliza emirimo.
Mu buweereza bwe tutambudde naye olugendo luwanvu, yetabanga mu mikolo mingi emitongole wamu n’enteekateeka zonna ezikulaakulanya abantu baffe, alaze eky’okulabirako ekirungi eri e ggwanga, tumusaaliddwa.
Twebaza Katonda olw’obulamu bwe wamu n’emirimo emirungi gyonna gyamukozesezza mu Nsi, tusaba mukama Katonda abagumye mu buyinike n’omugenzi amuwe ekiwummulo eky’omulembe”.
