Bundibugyo
Eyeesimbyewo ku kkaadi ya National Unity Platform (NUP), ku bwapulezidenti Robert Kyagulanyi Ssentamu, asuubizza abantu b’e Bundibugyo, okubazimbira amakolero ga Kokowa (Cocoa) mu kitundu kino singa anaafuuka Pulezidenti.
Ekisuubizo kino Kyagulanyi akikoze leero ku Lwokubiri bw’abadde asaba akalulu ku kisaawe ky’e Kirumya.
“Abantu ba Bundibugyo bakola nnyo, n’agamba Nubian Li nti Singa ndi Pulezidenti singa wano waliwo ekkolero lya ‘Chocolate’ ebyo ebintu byonna bisoboka.” Kyagulanyi bw’asabye akalulu.
Okusinziira ku bakulira ebibalo mu disitulikiti eno, ebitundu 85 ku buli 100 ku bantu abali mu kitundu kino beesigamye ku kirime kya Cocoa.
Disitulikiti eno efuna ssente obuwumbi 150 okuva mu kirime kino buli mwaka.
Kyagulanyi agambye nti wadde ekirime kya Cocoa kye kimu ku biwaniridde Uganda, naye ate gavumenti eno tefuddeyo ku balimi baakyo.
Ono yeeyamye okudduukirira abantu abakosebwa amataba era abakolere ku kizibu ky’enguudo n’ebyobulamu singa banaamwesiga ne bamuwa akalulu kaabwe.
Abamu ku bantu mu disitulikiti eno bategeezezza nti balina obwesige mu Kyagulanyi kubanga ebizibu byabwe abimanyi era nga basuubira nti singa ateekawo ekkolero lijja kusobola okuwa abavubuka emirimu.
Kyagulanyi atabukidde poliisi mu kitundu kino olwokugezaako okumulemesa okukuba enkung’aana era nga talaba nsonga lwaki bamulemesa okwogera n’abantu abalina okumuwa akalulu.
Okusooka ab’ebyokwerinda baggadde amakubo gonna agatuuka ku kisaawe kya Kirumya ne balagira n’abamu ku bantu okukyusa baddeyo, ekintu kye bagamba nti bakikoledde ku biragiro bya RDC mu kitundu kino.