Bya Emmanuel Mugeere
Luweero
Omwami wa Kabaka amukulembererako essaza Bulemeezi, Omulangira Ronald Mulondo asabye abakulembeze okulondawo basobole okutuusa empeereza mu bantu ba Kabaka era basobole okubagazisa okwettanira empeereza z’Obwakabaka.
Okusaba kuno Kkangawo Mulondo akukoledde Kasana- Luweero bw’abadde asisinkanye akabondo k’ababaka ba Palamenti abava e Luweero aka Bulemeezi Parliamentary Forum awamu n’abakulembeze ab’enjawulo mu kitundu kino.
“Njagala okwebaza ababaka ba Palamenti bonna bassentebe ba disitulikiti wamu n’abamagombolola nti omulimu bagukoze bulungi era mbeebaza olw’obumu bwe boolesezza era mbasaba munyweze obumu tusobole okugenda mu maaso.” Kkangaawo Mulondo bwe yagambye.
Bano bakubaganyizza ebirowoozo ku nsonga enkulu eziruma abantu mu kitundu kino era basazeewo okubaga ekiwandiiko ekyawamu kye bagenda okutwala mu Palamenti nga babanja okuweebwa ebintu ebigasiza awamu bannabulemeezi awatali njawukana za byabufuzi.
Bano era baagala gavumenti esasule ebintu bya Bannabulemeezi bye baafiirwa mu lutalo olwaleeta gavumenti eno mu buyinza era kijja kuyamba nnyo singa gavumenti esinga okufaayo ku ebyo ebibayambira awamu.
Akulira akabondo kano, Brendah Nabukenya yasabye banne okukola buli kimu okutumbula embeera z’abantu baabwe mu kitundu kino era n’abasaba okukolera awamu.
Ensisinkano eno yeetabiddwamu abakulembeze b’essaza, Omumyuka asooka owa Kkangaawo Margaret Mutyaba, omumyuka owookubiri Aaron Ddamulira, omuwanika w’essaza James Kyeyune n’abalala.
