Bya Ssemakula John
Kampala
Abaddde omumyuka wa Ssaabadduumizi wa poliisi y’eggwanga, Maj Gen Paul Lokech afudde, kino kikakasiddwa eggye ly’ eggwanga erya ‘Uganda People’s Defence Forces (UPDF)’ mu kiwandiiko ekyafulumiziddwa ku Lwomukaaga ku makya.
” Eggye lya UPDF n’ennaku nnyingi lubika okufa kw’ omumyuka wa Ssaabaduumizi wa poliisi y’eggwanga Maj Gen Paul Lokech. omwoyo gwe omukama agulaze kisa.” Eggye bweritegeezezza nga liyita ku mukutu gwalyo ogwa Twitter.
Okusinziira ku poliisi, Lokech abadde musajja muzira kuba alwaanye entalo eziwerako era erinnya lye lyavuga nnyo bweyali alwanyisa abatujju ba Alshabaab mu ggwanga lya Somalia wabula kibakubye wala okukeera nga ono afiiridde mu makaage.
Ssaabaduumizi wa poliisi, Martin Okoth Ochola ategeezezza nti, ” Nsindise akulira eby’obulamu mu poliisi , Dr Moses Byaruhanga akulemberemu abakugu okuzuula ekituufu ekyavuddeko okufa kw’omugenzi.”
Gen. Lokech ye yali akulira ‘Uganda Rapid Deployment Capability Centre’ e Jinja era eno Pulezidenti Yoweri Museveni gyeyamuggya nga 16/ 12/2020 namulonda okumyuka Ssaabaduumizi wa poliisi y’eggwanga wakati ng’eggwanga lyolekera akalulu ka 2021.
| ReplyForward |