Bya Ssemakula John
Kampala
Minisita wa Kampala n’emiriraano, asazizzaamu obukulembeze bw’obutale ne Lufula bwonna mu kibuga Kampala obuli wansi w’ekitongole kya Kampala Capital City Authority (KCCA).
Ekiragiro kino kiweereddwa Minisita wa Kampala, Betty Amongi, leero ku Mmande, bw’abadde ayogerako ne bannamawulire.
Okusinziira ku Minisita Amongi kino bakikoze okuteeka mu nkola ekiragiro kya Pulezidenti Museveni kye yafulumya nga 25/09/2020, mwe yalagira obukulembeze bw’obutale bwonna okusuulibwa ku bigambibwa nti buno bwali bubba abasuubuzi. Yalagira era wategekebwewo okulonda okuggya mu butale bwonna obwa gavumenti obuli mu Kampala.
Minisita Amongi agambye nti kino kyaddirira abasuubuzi abakolera mu butale ne Lufula okwekubira enduulu ewa Pulezidenti nga bagamba nti ensimbi ezaali zibasoloozebwako zaali nnyingi, ekintu ekibafiiriza n’okubaleetera okukolera mu mabanja kuba basasula amasannyalaze, eza kaabuyonjo wamu n’ensimbi endala.
“Obukulembeze bw’ebibiina ebyenjawulo bwawamba obukulembeze bw’obutale nebutandika okunyigiriza abasuubuzi ate ng’obutale buno bwaweebwa abasuubuzi bonna mu butale buno.” Minisita Amongi bw’ategeezezza.
Obukulembeze bw’abasuubuzi obukadde bugambibwa okunyunyunta abasuubuzi wamu n’okulemwa okutegeka okulonda okw’amazima.
Minisita Amongi agasseeko nti bataddewo akakiiko akataba minisitule ez’enjawulo okuli; Minisitule y’ebyobusuubuzi, Minisitule ya Kampala, ne Minisitule ya gavumenti ez’ebitundu, okulaba nga balung’amya obukulembeze bw’obutale.
Mu kiragiro ekipya, KCCA yeddiza obukulembeze bw’obutale era ng’egenda kuteekayo ttiimu ezigenda okuddukanya obutale buno.
Ttiimu zino zigenda kubeera n’enkalala z’abasuubuzi bonna abakolera mu butale ne Lufula era basasule ensimbi z’amazzi n’amasannyalaze awamu ne Kasasiro abasuubuzi, basobole okweyagalira mu butale bwabwe.
Bano era baweereddwa omulimu okukung’aanya ssente ezaateekebwawo mu mateeka abasuubuzi ze bateekeddwa okusasula.