![](https://gambuuze.ug/wp-content/uploads/2024/07/WhatsApp-Image-2024-07-17-at-4.25.19-PM-2-1024x683.jpeg)
Bya Ronald Mukasa
Mmengo – Kyaddondo
Kamalabyonna Charles Peter Mayiga atongozza ekkaddiyizo ly’ebitabo by’ ebyafaayo by’Obwakabaka bwa Buganda erizimbiddwa okutumbula eby’obulambuzi era nalaga obukulu bwabyo mu nkulaakulana y’ensi.
Omukolo guno Katikkiro Mayiga agukoledde ku kitebe ky’ekitongole ki Buganda Heritage and Tourism Board okuliraana Butikkiro ku Lwokusatu mu nteekateeka y’okulambula ebitongole by’Embuga.
Owek. Mayiga asanyukidde ebituukiddwako mukitongole kino naakubiriza abakozi okutuukiriza obuvunaanyizibwa bwabwe era bakole n’obumalirivu awamu n’okwagala.
![](https://gambuuze.ug/wp-content/uploads/2024/07/WhatsApp-Image-2024-07-17-at-4.25.19-PM-1024x683.jpeg)
Kamalabyonna Mayiga annyonnyodde nti wadde ekitongole Kya Kabaka kyokka abakikolamu bebasinga okukifunamu naye singa kiggwa bebasinga okukosebwa.
Mukuumaddamula annyonnyodde nti eby’obulambuzi bukulu nnyo mu bwakabaka nategeeza nti amawanga agamanyi okutunda eby’obulambuzi baggagawadde byansuso.
Ow’omumbuga bano abakubiriza okukolera awamu, nga basinganamu ekitiibwa awatali kusosola mu buli buvunaanyizibwa kubanga buli omu yetaaga obuwereza bw’omulala okutwala ekitongole kino mu maaso.
Ye Minisita w’Ebyobuwangwa, Ennono, Eby’obulambuzi n’Ebyokwerinda, Owek. Anthony Wamala agambye nti eby’obulambuzi byankizo nnyo kubanga bino bitundibwa Obwakabaka nebufuna ensimbi ate nebubisigaza, bwatyo nasaba abantu abakola mukitongole kino okukyilowooleza basobole okukyitwala obulungi mu maaso.
Kitegeerekese nti mu kkadiyizo lino muteereddwamu etterekkero ly’ebitabo by’Obwakabaka, ekkung’aanyizo ly’ebifaananyi saako nekiff ky’ebiluke ebiyiiye ngebimu ku bikijjuko by’amatikkira ga Nnyinimu ag’omulumdi ogwa 31.
![](https://gambuuze.ug/wp-content/uploads/2024/07/WhatsApp-Image-2024-07-17-at-4.25.19-PM-1-1024x683.jpeg)
Ensisinkano eno yetabiddwamu minisita w’Olukiiko Kabinenti n’Ensonga za Woofiisi ya Katikkiro Owek. Noah Kiyimba, Ssenkulu wa Buganda Heritage and Tourism Board Omuk Albert Kasozi, bakamisona abenjawulo mu kitongole kino, abakozi nabantu abalala bangi.