Bya Gerald Mulindwa
Mmengo
Katikkiro wa Buganda Charles Peter Mayiga atenderezza omukwano eggwanga lya Japan, lyegulina eri Obwakabaka wamu ne Uganda yonna okutwaliza awamu.
Bino Katikkiro Mayiga abyogedde asiibula Ambasada wa Japan mu Uganda, Kazuaki Kameda, mu nsisinkano eno ebadde mu Bulange e Mmengo olw’eggulo lwa leero ku Lwokuna.
Kameda, Katikkiro Mayiga ne Kabbineeti wamu n’abakungu abalala era n’asiima Obwakabaka olw’okufuula obuweereza bwe obw’emyaka egisoba mu 10 okubeera egy’ekitibwa n’essanyu.
Bw’abadde amusiibula, Katikkiro Mayiga nti Buganda erina ebintu bingi byeyigidde ku ggwanga lya Japan nga bayita mu nkolagana gye babadde nayo ne Ambasada Kameda.
Owek. Mayiga agambye nti basuubira agenda okumuddira mu bigere, okutwala mu maaso enkolagana gye balina kisobozese Uganda okwongera okuyigira ku nkulaakulana ya Japan n’Obwakabaka bwe Japan, obumazeewo ebyasa ebiwera.
Ono yeebazizza Kameda n’eggwanga lya Japan olw’okuwaayo ensimbi okuzzaawo amasiro g’e Kasubi wamu n’ebyuma ebizikiza omuliro.
“Japan nga bwemumanyi erina Kabaka amaze emyaka mingi, nga naffe tumulina era ng’amaze emyaka mingi. Era Japan y’emu ku abo abaatudduukirira ku mulimu gw’okuzzaawo Muzibwazaalampanga, baatuwa emitwalo 50 egya ddoola gya kyuma ekizikiriza omuliro.” Katikkiro Mayiga bw’agambye.
Mayiga annyonnyodde nti ensimbi zino zaaterekebwa mu kitongole ky’ebyobuwangwa eky’ekibiina kya mawanga amagatte ekiyitibwa UNESCO era nga bajja kuzikoseza ng’okusereka kuwedde.
Mu kusiibula, Ambasada Kameda ategeezezza nti Buganda erina ebintu bingi by’efaananya eggwanga lya Japan kubanga nabo mu buwangwa bwabwe ennyumba e Japan yabeeranga ya ssubi ng’eno y’ensonga lwaki baasitukiramu ng’amasiro gayidde.
Kameda alaze okusaalirwa olw’obutasobola kulaba ku masiro g’e Kasubi nga gawedde, naye n’ategeeza nti Obwakabaka bumusigadde ku mutima olw’emikwano gy’afunye e Buganda okuli; Ambasada Wasswa Biriggwa, Edward Kiyingi, Jean Mugerwa n’abalala.
Katikkiro Mayiga ne Ambasada Kameda buli omu atonedde munne ebirabo omubadde n’ekitabo kya ‘7 key Transformation Ideas’ ekyawandiikibwa Katikkiro Mayiga, okusobola okujjukira n’okusiima emirimu n’enkolagana etuukiddwako.